“20 Yanvar” faciəsinin 30-cu ildönümü ilə əlaqədar məktəb-liseydə anım günü
Bu gün İ.Məmmədov adına 261 nömrəli məktəb-liseydə 20 Yanvar Ümumxalq Hüzn Gününə həsr olunmuş silsilə tədbirlər keçirilib. Faciənin 30-cu ildönümü münasibətilə 3b sinfinin təşkil etdiyi “ Günəşin doğması üçün qan lazım imiş” adlı anım tədbiri keçirilib.Tədbirdə faciə qurbanlarının xatirəsi bir dəqiqəlik sükutla yad olunub. Uşaqlar şəhidlik zirvəsinə ucalarkən onlar kimi məktəbdə şagird olan Larısa Məmmədova, İlqar İbrahimovdan bəhs edən səhnəciklər təqdim edərək bu faciənin həm də qəhrəmanlıq salnaməsi olduğunu önə çəkiblər.Tədbir boyu təqdim olunan səhnəciklərdə şagirdlər balaca ürəklərində necə böyük vətən sevgisi daşıdıqlarını nümayiş etdiriblər.Anım tədbiri məktəb-liseyin digər siniflərində də 20 Yanvara həsr olunan ədəbi-bədii kompozisiyaların göstərilməsi, şeir və bayatıların söylənilməsi, rəsm sərgilərinin nümayişi ilə davam etdirilmişdir.Tədbirin sonunda məktəb-liseyin direktoru A.H.Əsədov çıxış edərək uşaqların bu təşəbbüsünü alqışlayıb və 20 Yanvar faciəsi ilə bağlı öz xatirələrini bölüşüb, 20 Yanvar Azərbaycan xalqının tarixinə unudulmaz qəhrəmanlıq səhifəsi kimi daxil olunduğunu qeyd edib, məktəblilərə bu tarixi heç vaxt unutmamağı tövsiyə edib.Eyni zamanda məktəb-liseyin direktoru tədbiri hazırlayan uşaqların sinif rəhbəri Hümbətova Sevil müəlliməyə, belə vətənpərvər övladlar yetişdirdiyinə görə valideynlərə təşəkkürünü bildirmişdir.
