261 №-Lİ MƏKTƏB-LİSEY

Məktəb-liseyin psixoloqu Məhərrəmova Aygün tərəfindən IX sinif şagirdləri ilə "İmtahan stresinin aradan qaldırılması yolları" haqqında maarifləndirici və profilaktik söhbət aparılıb. Aparılan söhbətin əsas məqsədi şagirdlərin imtahan həyəcanını idarə edilməsi yolları haqqında üsul və texnikaları aşılamaqdır. Söhbət zamanı şagirdlərə doğru yönləndirmə, motivasiya yolları,konsentrasiyanın itirilməməsi üzrə tövsiyələr verilib. Sonda şagirdlərin sualları cavablandırılıb.

"Zəkaların Mübarizəsi" olimpiadasının şahmat istiqaməti üzrə regional mərhələsində Xətai rayonunu təmsil edən komanda Bakı şəhəri üzrə birincilik əldə edib. Xətai rayonu üzrə 5 müxtəlif məktəbin şagirdlərindən ibarət komandada məktəb-liseyin 9d sinif şagirdi Banuçiçək Aslanova da var. Şagirdimizi təbrik edir, komandaya respublika mərhələsində qələbə arzulayırıq.

Aprelin 10-da məktəb-liseyin IXsinif şagirdlərinə imtahana buraxılış vərəqələri təqdim olunub. Məktəb-liseyin direktoru Könül Məmmədli şagirdlərə tövsiyələr verib və onlara uğurlar arzu edib. Qeyd edək ki, məktəb-liseyin IX siniflərində 109 şagird təhsil alır. Onlar aprelin 13-də ümumi təhsil səviyyəsi üzrə buraxılış imtahanlarında iştirak edəcəklər.

Aprelin 9-da məktəb-liseydə Bakı Şəhəri üzrə Təhsil İdarəsi tərəfindən ümumi təhsil müəssisələrinin V-Xl sinif şagirdlərinin iştirakı ilə keçirilən “Sağlam nəsil-parlaq gələcək” layihəsi çərçivəsində idmanın müxtəlif növləri üzrə nailiyyəti olan idmançılarla görüşlər təşkil edilməsi planına uyğun olaraq Rio-2016 Yay Olimpiya Oyunlarının gümüş mükafatçısı Rüstəm Orucovun idmançı şagirdlərlə görüşü təşkil edilib. Görüşdə Milli Olimpiya Komitəsinin OCEP layihəsinin ekspert qrupunun sədri Namiq Cəfərov da iştirak edib. Məktəb-liseyin 10c sinif şagirdi Fatimə Səfərovanın hazırladığı, idmançımızın idman karyerasını və qazandığı qələbələri əks etdirən videoçarx nümayiş olunduqdan sonra Rüstəm Orucov çıxış edərək əldə etdiyi qələbələrin sevincini şagirdlərlə bölüşüb. Daha sonra şagirdləri maraqlandıran suallar cavablandırlıb. Məktəb-liseyin direktoru Könül Məmmədli öz çıxışında lahiyənin əhəmiyyətindən bəhs edərək, gənclərin sağlam həyat tərzinin gələcək üçün vacibliyini xüsusi vurğulayıb, bu cür səmimi görüşlərin şagirdlərin idmana olan marağının ,sevgisinin artmasına səbəb olacağını qeyd edib. Sonda xatirə şəkli çəkilib.

Aprelin 8-də “Təbiət fənləri” aylığı çərçivəsində məktəb- liseyin kimya müəllimi Vəfa Alıyevanın 7a sinfində “ Ekzotermik və endotermik reaksiyalar” mövzusunda nümunəvi dərsi təşkil olunub. Dərsdə məktəb-liseyin direktoru Könül Məmmədli, direktor müavini Samirə Məhərrəmova, metodbirləşmə rəhbəri Vəfa Qaraşova və fizika və kimya müəllimləri iştirak ediblər. Dərsin əsas məqsədi şagirdlərin ekzotermik və endotermik reaksiyaların mahiyyətini başa düşüb fərləndirməsi, söz tənliyi vasitəsilə ifadə etməsi qabiliyyətini yoxlamaq və mövzuya uyğun sadə təcrubələr aparmaq bacarığını formalaşdırmaq olub. Bütün sinif fəaliyyətə cəlb olunaraq təlim nəticəsinə uyğun qiymətləndirilib.