Şuşada şəhadətə yüksələn Vətən Müharibəsi Qəhrəmanı
Məktəbin illik fəaliyyət planına uyğun olaraq şəhid Mehrab Niftəliyev adına 3 “A” sinfinin rəhbəri Rəna Abdullayeva şəhidin anım gününü qeyd etdi.
Tədbirdə şagirdlər Mehrab Niftəliyev haqqında, döyüşlərdə göstərdiyi qəhrəmanlıqlardan danışıb, ona həsr olunmuş kiçik səhnəcik nümayiş etdirdilər.
Qeyd olunub ki, M.Niftəliyev qısa, amma mənalı ömür yaşayıb, canını Vətən torpaqlarının azadlığı uğrunda fəda edib.
Qeyd edək ki, Niftəliyev Mehrab Söhrab oğlu 1985-ci ilin mayın 13-də Qubada anadan olub. 17 il Azərbaycan Müdafiə Nazirliyinin Baş Qərargahının tabeçiliyində olan Xüsusi Təyinatlı Qüvvələrdə qüsursuz xidmət edib. O, Azərbaycanla yanaşı, digər xarici ölkələrdə təşkil edilən hərbi təlimlərdə uğurlara imza atıb.
Vətən müharibəsi zamanı Cəbrayıl, Füzuli və Şuşada döyüşüb, düşmənin bir neçə zabit və hərbi qulluqçusunu, eyni zamanda, zirehli texnikasını məhv edib. M.Niftəliyev noyabrın 8-də Şuşada qəhrəmancasına şəhid olub.
Şəhidin qəhrəmanlığı Prezident, Ali Baş Komandan İlham Əliyev tərəfindən yüksək qiymətləndirilib. M.Niftəliyev "Vətən müharibəsi qəhrəmanı" adı, "Cəbrayılın azad olunmasına görə", "Şuşanın azad olunmasına görə" və "Vətən uğrunda" medalları ilə təltif edilib.
Allah rəhmət eləsin!
