Ana dili və fənn aylığına start verildi
Beynəlxalq Ana Dili Günün bu aya təsadüf etməsi ilə əlaqədar “Ana dili və ədəbiyyat fənn aylığının məhz fevral ayında qeyd olunması artıq məktəbimizdə ənənə şəklini almışdır. Fənn birləşmə üzvlərinin keçirdiyi müzakirədə iş bölgüsü aparıldı və ay ərzində görüləcək işlər, həftəlik qrafiklər əsasında tərtib edildi. 01-08 fevral tarixlərinə təsadüf edən ilk dərs həftəsinə məktəbin pilləkənlərinə düzgün orfoqrafiya qaydalarını əks etdirən yazılı qeydlərin yapışdırılması, əslən Cənubi Azərbaycandan olan yazıçı və şairlərin əsərlərinin bədii müzakirəsinin təşkil olunması, 2023-cü il yubleyi təsadüf edən yazıçı və şairlərin həyat-yaradıcılıqlarını əks etdirən fotostendlərin hazırlanması, II Qarabağ müharibəsi şəhidlərinə həsr olunan şeirlərdən ibarət müsabiqənin təşkil olunması təyin edildi.
Ay ərzində davamlı olaraq keçirilməsi nəzərdə tutulan 2 layihə şagirdlərin xüsusi marağına səbəb oldu, “Düzgün yaşamaq düzgün danışmaqdan başlayır” adlı layihə çərçivəsində bütün məktəb kollektivinin ləhcəsiz, dialektlərdən istifadə etmədən, orfoepik qaydalara uyğun danışması tövsiyə olundu. Hər sinifdən 1 şagird olmaqla seçilən simvolik “Dil polisləri” müəllimlərin və şagirdlərin nitqindəki qüsurlarını qeyd etmək üçün təhkim olundular.
Təlim nəticələrinin yüksəlməsinə, siniflərarası əməkdaşlığın artmasına təsiri baxımından “Mənə cavab ver” adlı digər bir layihənin də bütün ay ərzində həyata keçirilməsi planlaşıdırıldı. Layihənin şərtlərinə əsasən hər həftənin 1 dərs saatı hər sinif seçdiyi digər sinfin şagirdlərinə sual və tapşırıqlar təqdim edir. (Sual və tapşırıqlara aid nümunələr:Sözlərin mənasını müəyyən edin və cümlədə işlədin; Verilmiş qafiyə əsasında şeir yazın; Verilmiş mövzuya uyğun hekayə qurun şifahi xalq ədəbiyyatının lirik növünə aid nümunələr əzbərlərin və s.) Təyin edilmiş digər dərs saatında sual və tapşırıqları qəbul edən sinfin şagirdləri bu cavabları təqdim edirlər.
Fənn aylığında keçirilməsi nəzərdə tutulan ən vacib tədbirlərdən biri də "Heydər Əliyev və Azərbaycan dili" mövzusunda keçiriləcək elmi praktik konfrans olacaqdır.
