“Qarabağa qayıtdıq”adlı video konfrans keçirildi
29 dekabr 2020-ci il tarixində 31 dekabr Dünya Azərbaycanlılarının Həmrəylik günü ilə əlaqədar olaraq tərbiyəi şləri üzrədirektor müavini Elza Cəfərovanın təşəbbüsü ilə “Qarabağa qayıtdıq” adlı video konfrans keçirildi. Onlayn qaydada təşkil olunan iclasda giriş sözü ilə tərbiyə işləri üzrə direktor müavini Elza Cəfərova açıb. Şəhidlərin əziz xatirəsi bir dəqiqəlik sükutla yad edilib. Elza Cəfərova vurğulayıb ki, şanlı qələbəmizin təməlində Ali Baş Komandanın sarsılmaz qətiyyəti və müzəffər şanlı ordumuzun rəşadəti dururdu. Tərbiyə işləri üzrə direktor müavini gənc nəslin təlim-tərbiyəsində bu cür tədbirlərin əhəmiyyətini vurğulayıb.
Gənclərin Çağırışaqədərki Hazırlıq müəllimi Fazil Ağayev məhz cari ilin sentyabrın 27-də işğalçı ölkənin növbəti genişmiqyaslı hərbi təxribatına cavab olaraq başlanan Vətən müharibəmizdə ölkə başçısı cənab İlham Əliyev başda olmaqla, Azərbaycan Ordusunun və xalqımızın düşmən üzərində həlledici qələbə qazanması ilə başaçatması haqqında şagirdlərə ətraflı məlumat verdi.
Daha sonra çıxış edən tarix müəllimi Vüsalə Alyarova Azərbaycanın ərazi bütövlüyü və azadlığı uğrunda canlarından keçən 44 günlük müharibədə dünya hərb tarixinə yeni bir səhifə yazan, müzəffər ordumuzun erməni təxribatlarına cavab olaraq əks-hücum əməliyyatlarına başlamaqla xalqımıza böyük qələbə sevinci yaşadan və əbədi olaraq zirvəyə ucalan şəhidlər haqqında hazırladığı video slaydı iştirakçılara təqdim etdi.
Konfransda həmçinin məktəbin psixoloqu Kubra Əliyeva və laborant Vəfa Quliyeva çıxış edərək mövzu ilə əlaqədar olaraq öz fikirlərini səsləndirdilər.
Sonda məktəbin V-X sinif şagirdləri hazırladıqları şeir, inşa və rəngarəng boyalarla çəkdikləri rəsmlərdə doğma Qarabağı canlandırmağa çalışdılar.
