231 №-li tam orta məktəb

Fövqəladə Hallar Nazirliyinin (FHN) 5 iyun 2023-cü il tarixində məktəbdə “Fövqəladə hallarla bağlı davranış və yanğın təhlükəsizliyi qaydaları” mövzusunda maarifləndirmə tədbiri keçirib. Tədbir zamanı məktəbin müəllim və şagirdlərinə müxtəlif xarakterli təbii və texnogen xarakterli fövqəladə halların yaranma səbəbləri, elektrik təsərrüfatında yanğın təhlükəsizliyi, məişətdə qazdan təhlükəsiz istifadə, ildırım, sel və daşqın zamanı hərəkət qaydaları ilə bağlı məlumatlar verilib.

Sonra məişətdə və nəqliyyatda yanğın, dəm qazı, zəlzələ və torpaq sürüşməsi zamanı təhlükəsiz davranış qaydaları, odsöndürücü balonlardan istifadə üsulları və fövqəladə hadisələrin vaxtında qarşısının alınmasında “112 qaynar xətti” nin roluna dair məruzələr dinlənilib.

Şagirdlərin nailiyyətlərini üzə çıxarmaq, bilik və bacarıqlarını yoxlamaq məqsədilə məktəbdə 2022-2023-cü tədris ilinin II yarımili üzrə iyun ayından etibarən Böyük Summativ Qiymətləndirmə keçirilir.

            Böyük Summativ Qiymətləndirmədə BŞTİ və məktəb tərəfindən hazırlanmış qiymətləndirmə vasitələrindən istifadə olunaraq, IV, IX və XI siniflərdə  bütün fənlərdən, V, VI, VII, VIII və X siniflərdə isə yalnız buraxılış imtahanları keçiriləcək fənlər üzrə aparılır. BSQ-lərin keçirilməsi məktəb rəhbərliyi tərəfindən həyata keçirilir.

       Təhsildə  əldə olunan uğur, nailiyyət birbaşa kitablarla bağlıdır. Məktəbimizdə şagirdlərin kitaba, bədii qiraətə olan marağını artırmaq, oxu bacarığını, mədəniyyətini inkişaf etdirmək üçün müxtəlif ədəbi-bədii tədbirlər, layihələr həyata keçirilir.  1 iyun 2023-cü il tarixində  məktəbin foyesində direktor Lamiyə Quliyevanın təşəbbüsü ilə yaradılmış "Oxu güşəsi"nin açılışı oldu. Guşənin hazırlanmasında və zənginləşdirilmasində kitabxanaçı Mirzəhra Bayramova və məktəb şagirdlərinin  birgə əməyi olmuşdur. Guşənin yaradılmasında məqsəd şagirdlərdə mütaliə mədəniyyətini inkişaf etdirmək, onlar arasında oxu vərdişini artırmaqdır.

     1 İyun dünyanın əksər ölkələrində olduğu kimi, Azərbaycanda da qeyd edilir. Bu bayramla yanaşı, BMT-nin Baş Assambleyası tərəfindən 20 noyabr tarixində Ümumdünya Uşaqlar Günü də qeyd olunur. Bu Ümumdünya Uşaqlar Günü isə 1954-cü ildə BMT-nin Baş Assambleyasının № 836 (IX) saylı qətnaməsində 1956-cı ildən bütün dövlətlərdə uşaqların şərəfinə keçirilməsi tövsiyə edilən bayram kimi qeyd edilib.  
    Azərbaycan Respublikasının prezidenti İlham Əliyevin ölkədə uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədi ilə 22 dekabr 2008-ci il tarixli sərəncam imzalayıb. Sərəncama əsasən, 2009-cu il "Uşaq ili" elan olunmuşdu. Mövzu ilə əlaqədar olaraq 01 iyun 2023-cü il tarixində məktəbdə 1 İyun – Uşaqların Beynəlxalq Müdafiəsi Günü qeyd edilib. Direktor Lamiyə Quliyevanın təşəbbüsü ilə  şagirdlər  üçün əlamətdar bir gündə şagirdlər sinif müəllimlərin dərs cədvəlinə uyğun olaraq fənnləri,  dərs deyən müəllimləri əvəz etdilər. Sonra şagirdlərin fənnlər üzrə keçirdiyi dəsrlərlə bağlı maraqlı müzakirələr keçirildi. Yaradıcı mühitdə dərslərin aparılması ilə bağlı tövsiyyələr verildi.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində 1 İyun-Uşaqların Beynəlxalq Müdafiəsi Günü ilə əlaqədar tədbirlər keçirilib.

Paytaxt məktəblərində təşkil olunan tədbirlərdə Uşaqların Beynəlxalq Müdafiəsi Günü haqqında şagirdlərə məlumat verilib. Bildirilib ki, 1950-ci il iyunun 1-də BMT Baş Assambleyası tərəfindən Uşaqların Beynəlxalq Müdafiəsi Gününün qeyd olunması qərara alınıb. Vurğulanıb ki, Azərbaycanda hər zaman uşaqların müdafiə olunması və onlara qayğı göstərilməsi istiqamətində çoxsaylı işlər görülür.

Tədbirlərdə çıxış edənlər Ulu Öndər Heydər Əliyevin uşaqlara olan diqqət və qayğısından danışıblar. Qeyd olunub ki, ölkə Prezidenti İlham Əliyevin uşaqların savadlı, sağlam və firavan böyüməsi, rifahının yüksəldilməsinə göstərdiyi qayğı və diqqət deməyə əsas verir ki, bu məsələ dövlət siyasətinin başlıca istiqamətlərindən biridir.

Eyni zamanda tədbirlərdə şagirdlər Azərbaycan və dünya xalqlarına məxsus mahnılar oxuyub, rəqslər ifa edib, şeirlər söyləyib və ədəbi-bədii kompozisiyalar nümayiş etdiriblər.

Bundan əlavə, tədbirlərdə Uşaqların Beynəlxalq Müdafiəsi Gününə həsr olunan fotostendlərə, şagirdlərin əl işlərindən ibarət sərgilərə baxış keçirilib.