Qədim Yurdum Naxçıvanın 100 illik tarixi
Bu gün məktəbin akt zalında Naxçıvan Muxtar Respublikasının 100 illiyinə həsr olunmuş möhtəşəm tədbir keçirildi. Tədbir zamanı Naxçıvanın qədim dövrlərdən müasir günümüzə qədər uzanan zəngin tarixi, onun dünya mədəniyyətinə və tarixinə bəxş etdiyi görkəmli şəxsiyyətlər, tanınmış alimlər və ədiblər haqqında maraqlı məlumatlar təqdim olundu.
Naxçıvanın əlverişli coğrafi mövqeyi və bu yurd yerinin zəngin təbii sərvətləri, tarixi abidələri və qədim adət-ənənələri tədbirin əsas mövzularından biri idi. Şagirdlərə qədim dövlətlərdən – Əhəmənilər, Atropatena, Sasanilər, eləcə də Naxçıvanın İslam mədəniyyəti dövründəki əhəmiyyətindən bəhs edən videoçarxlar nümayiş etdirildi.
Tədbirin məqsədi şagirdlərə Naxçıvanın təkcə Azərbaycanın deyil, həm də dünyanın qədim sivilizasiya mərkəzlərindən biri olduğunu daha yaxşı anlatmaq, onların tarixə və milli dəyərlərə olan maraqlarını artırmaq idi.
