Dünya səhnələrini fəth etmiş səs
01.11.2017-ci il tarixində məktəbimizdə Azərbaycan musiqisinin əvəzedilməz səs sahibi Bülbülün 120 illik yubileyi təntənə ilə qeyd edildi. Tədbirdə Qarabağ torpağının yetirməsi olan Bülbülün – Murtuza Məşədi Rza oğlu Məmmədovun keçdiyi şərəfli həyat yoluna nəzər salındı. Şagirdlərin çıxışlarında qeyd edildi ki, Bülbül səhnə fəaliyyətinə 1916-cı ildə başlamışdır. 1920-ci ildən Azərbaycan Dövlət Akademik Opera və Balet Teatrının solisti olmuşdur. Təhsilini bir müddət İtaliyada davam etdirmiş, sonra Azərbaycan Dövlət Konservatoriyasında dərs deməyə başlamışdır. Dünya səhnələrini öz heyrətamiz səsi ilə valeh edən Bülbülün bir çox dövlət mükafatlarına layiq görüldüyü vurğulandı. Valehedici səs sahibinin “Sənsiz”, “Sevgili canan” əsərlərinin indi də milyonlarla insanın qəlbini fəth etdiyi qeyd edildi. Şagirdlərin ifasında sənətkarın musiqilərindən nümunələr səsləndirildi. Həyat və yaradıcılıq yolundan bəhs edən videolentlər göstərildi. Tədbir şagirdlərin maraqlı çıxışları ilə yadda qaldı.
