92 №-li tam orta məktəb

08.07.2024 cü il tarixində məktəbimizdə 2023-2024-cü tədris ilində IX sinifdə təhsil alan şagirdlərə ümumi orta təhsil haqqında attestatlar və XI sinif şagirdlərinə isə tam orta təhsil haqqında attestatlar məktəb rəhbərliyi tərəfindən təqdim olundu. Şagirdlər imza ataraq attestatlarını təhvil aldılar. Şagirdlərə gələcək həyatlarında nailiyyətlər arzulayırıq.

Bakı Şəhəri üzrə Təhsil İdarəsi (BŞTİ) tərəfindən paytaxtın təhsil müəssisələrinin iştirakı ilə “Məktəblinin yay mütaliəsi” adlı layihəsinə start verilir.

Layihənin əsas məqsədi şagirdlərin yay tətili günlərində asudə vaxtlarının səmərəli təşkili, mütaliəyə maraqlarının artırılması, kitab mübadiləsi mədəniyyətinin genişləndirilməsi, oxu bacarıqlarının inkişaf etdirilməsi və nitq vərdişlərinin təkmilləşdirilməsindən ibarətdir.

Layihə çərçivəsində paytaxtın təhsil müəssisələri şagirdlərin oxuduğu kitabları əks etdirən fotoşəkilləri, yaxud oxuduqları əsər və onun müəllifi ilə bağlı fikirlərinə dair videogörüntüləri məktəbin sosial şəbəkə hesablarında #məktəblininyaymütaliəsi haşteqi ilə paylaşması nəzərdə tutulur.

Qeyd edək ki, layihə sentyabr ayına qədər davam edəcək.

Bu il COP29-un Azərbaycanda keçirilməsi eyni zamanda 2024–cü ilin  ”Yaşıl dünya naminə həmrəylik ili” elan olunması ölkəmiz üçün əhəmiyyətlidir. Zəngin founa və floramızın qorunması dövlətimizin prioritel məsələlərindəndir. Tədbirlər planına uyğun olaraq məktəbimizdə ətraf mühitin qorunması, yaşıllıqlara qulluq və onların artırılması məqsədilə məktəbin həyətində növbəti iməcilik təşkil olundu. Ağac və gül kollarına qulluq edildi.

İyunun 21-də dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb.

Qaydalara müvafiq olaraq, test imtahanı ilə bağlı məlumat 15 may tarixində iştirakçıların şəxsi kabinetlərinə göndərilib.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində çalışan 2 379 təhsilverən sertifikatlaşdırma prosesinin test imtahanı mərhələsinə  dəvət olunub.

Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova və BŞTİ-nin müvafiq struktur bölmə rəhbərləri imtahan mərkəzinə gəlib və müəllimlərə öz tövsiyələrini verib, uğurlar arzulayıb.

Qeyd edək ki, test imtahanı mərhələsində 120 dəqiqə müddətində təhsilverənlərin tədris etdiyi fənn üzrə ümumi təhsil proqramlarına, tədris metodikasına və təlim strategiyalarına aid 60 sual təqdim edilir. Hər düzgün cavab 1 balla qiymətləndirilir. Bu mərhələnin nəticələri üzrə balların hesablanması avtomatlaşdırılmış rejimdə proqram təminatı vasitəsilə həyata keçirilir və imtahan başa çatdıqdan dərhal sonra namizədin kompüterinin ekranında görünür.

Nəzərinizə çatdırırıq ki, test imtahanında mümkün 60 baldan minimum 30 bal toplamış təhsilverənlər sertifikatlaşdırmanın müsahibə mərhələsinə iştirak hüququ qazanacaq.

Xatırladaq ki, Nazirlər Kabinetinin 18 avqust 2022-ci il tarixli qərarına əsasən, dövlət ümumi təhsil müəssisələrinin təhsilverənlərinə sertifikatlaşdırmanın nəticəsinə uyğun olaraq tədris edilən dərs saatına görə test imtahanı mərhələsində nəticə göstərənlərin vəzifə maaşlarına əlavələr ediləcək.

Sertifikatlaşdırmada iştirak edən bütün müəllimlərə uğurlar arzulayırıq!

 İyunun 14 - də məktəbimizdə 2023-2024-cü tədris ilinə həsr olunmuş "Son zəng " tədbiri keçirildi. Tədbirdə məktəbin direktoru, müavinlər, valideynlər iştirak etdilər. Azərbaycan Respublikasının Dövlət Himninin səsləndirilməsindən sonra tədbir açıq elan edildi. Vətən uğrunda canından keçən şəhidlərimizin ruhu bir dəqiqəlik sükutla yad edildi. Məktəbin direktoru Azər Həsənov çıxış edərək qeyd etdi ki,insan həyatında elə günlər olur ki,ömür boyu unudulmur. Bu yaddaqalan, hər an xatırlana biləcək günlərdən biri də "Son zəng " günüdür. Uşaqlığımızın ən çılğın,ən qayğısız vaxtları məktəb illərində olur. Hər dəfə məktəbdən söz düşəndə ürəyimiz sızıldayır, qəlbimizin dərinliklərindən " kaş o günlərə dönə biləydim" arzusu keçir. Çıxış edən müəllimlər, valideynlər yeni həyata qədəm qoyan bu gənclərə uğurlar dilədilər. Yüksək əhval-ruhiyyə ilə keçirilən tədbir şən, oynaq milli musiqi sədaları altında sona çatdı.