Heydər Əliyev və Azərbaycan dili
04.05.2021-ci il tarixdə məktəbin Azərbaycan dili və ədəbiyyat müəllimi Gülmira Məmmədovanın 6b sinfində təşkil etdiyi onlayn dərs ümummilli lider Heydər Əliyevin anadan olmasının 98-ci ildönümünə həsr olundu. Fənn müəllimi çıxışında Azərbaycan xalqının tarixində misilsiz xidmətlər göstərmiş H.Ə.Əliyevin həyat və fəaliyyəti barəsində ətraflı məlumat verdi. Dərsin əsas hissəsini isə “Heydər Əliyev və Azərbaycan dili” mövzusu təşkil etdi. G.Məmmədova ulu öndərin ana dilimizin saflığı və qorunması uğrunda apardığı yorulmaz fəaliyyəti, bütövlükdə milli dil siyasəti barəsində geniş məruzə etdi. Tariximizə H.Əliyev epoxası kimi daxil olmuş 1969-2003-cü illərdə Azərbaycan dilinin hərtərəfli inkişafı uğrunda uzaqgörən siyasət yürütdüyünü xüsusi vurğuladı. 6b sinif şagirdləri də dahi şəxsiyyətin fəaliyyəti haqqında məlumatlarla çıxış etdilər. İştirakçılar görkəmli şəxsiyyətin ana dilimiz haqqında qiymətli kəlamlarından nümunələr söylədilər, ona həsr olunan şeirlər ifa etdilər. Onlayn dərs zamanı H.Ə.Əliyevin milli dil siyasətini əks etdirən slaydlar da nümayiş olundu.
