Zəfərə gedən yolun başlanğıcı
2016-cı il aprelin əvvəllərində Azərbaycanın ön xətt mövqeləri və yaşayış məntəqələri Ermənistan silahlı qüvvələri tərəfindən intensiv artilleriya atəşinə məruz qalanda ordumuzun bölmələri əks-həmlə ilə təxribatların qarşısını aldı. Bu, aprel döyüşləri kimi tarixləşdi.
Döyüşlər Azərbaycan Ordusunun qələbəsi ilə nəticələndi. Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Madagiz kəndi istiqamətində bəzi mövqelər düşməndən azad olundu. Bununla da cinayətkar erməni rəhbərlərinin keçilməz erməni səngərləri haqqında mifi alt-üst edildi.
Aprel döyüşlərində şücaətlə vuruşan və vətəni uğrunda canını sipər edən Azərbaycan əsgərləri bir daha ordumuzun yenilməz olduğunu sübut etdilər.
Aprel döyüşlərində şəhid olanlar zəfər tarixini yazan igidlərdir. Onlara Allahdan rəhmət diləyir, tezliklə işğal altındaki bütün torpaqlarımızın ordumuz tərəfindən geri qaytarılacağına inanırıq.
