Nizami rayonu 62 nömrəli məktəb-liseyində Vətən Müharibəsi şəhidi Elsevər Əhədzadənin doğum günü qeyd olunub.
03.06.2022-ci il tarixində Xalid Quliyev adına 62 nömrəli məktəb-liseyin məzunu olmuş şəhidin doğum günü tədbiri onun Keşlə qəsəbəsi Şəhidlər Xiyabanındakı məzarını ziyarətlə başlayıb. Ziyarətdə Nizami Rayon İcra Hakimiyyətinin başçısı Coşqun Cəbrayılov, rayonun güc strukturlarının rəhbərləri, İcra Hakimiyyətinin məsul şəxsləri, şəhid ailələrinin üzvləri, ictimaiyyət nümayəndələri, 62 nömrəli məktəb-liseyin rəhbərliyi, həmçinin Missiya Media Qrupunun təmsilçiləri iştirak edib. Ziyarətçilər şəhidin məzarına gül dəstələri və əklillər qoyub, ruhuna dualar oxuyublar. Sonra şəhidin məzunu olduğu 62 nömrəli məktəb-liseydə anım tədbiri keçirilib. Azərbaycan Respublikasının Dövlət Himni səsləndirildikdən sonra ölkəmizin ərazi bütövlüyü və suverenliyi naminə canını qurban vermiş şəhidlərimizin əziz xatirəsi bir dəqiqəlik sükutla yad edilib. Daha sonra məktəbin şagirdlərinin ifasında vətənpərvərlik ruhunda ədəbi-bədii kompozisiya, şəhid Elsevər Əhədzadənin xatirəsinə həsr edilmiş video-çarx nümayiş etdirilib. Mərasimdə çıxış edən 62 nömrəli məktəbin direktoru Mətanət Cabbarlı qonaqları salamlayaraq, tədbirdə iştirak edən şəhid ailələrinə, qazilərə minnətdarlığını bildirib.
