Hüzn günü
Azərbaycan xalqının tarixinə Qanlı Yanvar faciəsi kimi daxil olmuş 1990-cı il 20 Yanvar hadisələrindən artıq 29 il keçir. Keçmiş sovet dövlətinin həmin gün Azərbaycan xalqına qarşı həyata keçirdiyi hərbi təcavüz insanlığa qarşı törədilmiş ən ağır cinayətlərdən biri kimi yaddaşlarımızda əbədi qalacaqdır. Milli azadlıq və ərazi bütövlüyü uğrunda mübarizəyə qalxmış dinc əhaliyə silahlı təcavüz nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi. Tariximizin acı səhifələri Bakı şəhəri Novruzov qardaşları adına 36 nömrəli tam orta məktəbin kollektivinin təşkil etdiyi tədbirdə də bir daha dərin hüzn ilə yad olundu. Eyni zamanda anım günündə birinci saat keçilən dərslərin hər biri ölməz şəhidlərimizin əziz xatirəsinə həsr olundu.
