7 dekabr - Beynəlxalq Mülki Aviasiya Günü kimi qeyd olunur
1996-cı il dekabrın 6-da BMT Baş Məclisi tərəfindən “7 dekabr - Beynəlxalq Mülki Aviasiya Günü” elan olunmuşdur. Azərbaycan Respublikasının Dövlət Mülki Aviasiya Administrasiyası Azərbaycan Respublikası Prezidenti İlham Əliyevin 2006-cı il 29 dekabr tarixli Fərmanı ilə yaradılmışdır və mülki aviasiya sahəsində nəzarəti, dövlət siyasətini və tənzimləməsini həyata keçirən mərkəzi icra hakimiyyəti orqanıdır.1994-cü ildə Mülki Aviasiya Mərkəzinin bazasında Milli Aviasiya Akademiyası yaranmışdır. Böyük qürur hissi ilə qeyd edirik ki, bu sahədə 44 günlük müharibə zamanı misli görünməyən uğurlu planlar həyata keçirilmiş, düşmənə saysız-hesabsız zərbələr endirilmişdir. Bu tarixi gün ilə bağlı məktəbin tarix müəllimi Afət Hətəmova tərəfindən “Səmanın qəhrəmanları” başlığı altında 10d sinfində maarifləndirici söhbət aparıldı. Aviasiya sahəsinin ölkəmizdə inkişafı barədə söz açan müəllim şagirdləri ətraflı şəkildə məlumatlandıraraq keçmiş və müasir dövrümüzlə müqayisədə hansı yeniliklərin həyata keçirildiyini şagirdlərin nəzərinə çatdırdı. Qeyd edək ki, 45 dəqiqə ərzində şagirdlər üçün ən təsirli məqam müəllimin bir neçə gün əvvəl tədris müəssisəmizin Azərbaycan dili və Ədəbiyyat müəllimi Şəmidə Əliyevanın oğlu, Dövlət Sərhəd Xidmətinə məxsus helikopterdə təlim uçuşlarının həyata keçirilməsi zamanı qəzaya uğrayaraq şəhidlik zirvəsinə ucalmış məktəbin məzunu, öz şücaəti, uğurlu fəaliyyəti, qətiyyətliliyi, ilə hər kəsin dilinə dastan olan Vətən müharibəsinin fəal iştirakçısı Mayor Emil Elman oğlu Əliyevin xidməti dövründə göstərdiyi qəhrəmanlıqlardan bəhs etdiyi anlar oldu. Şərəfli xidmət yolu ilə hər birimizin qürur duyduğu ölməz qəhrəmanımız Şəhid Mayor Emil Əliyevin timsalında yurdumuzun azadlığı, bütövlüyü uğrunda canından keçmiş, xalqın sülh ilə firavan yaşaması üçün gecə-gündüz bilmədən çalışaraq həyatını qurban etmək bahasına igidlik nümayiş etdirən, qorxu bilmədən ölümün gözlərinə dik baxaraq mərdliklə Şəhadətə qovuşan, yaddaşlarımızda əbədi qalacaq bütün mərd oğullarımıza Allahdan rəhmət, ailələrinə səbir diləyirik!
