“Son zəng” tədbiri keçirilib
İyunun 14-də respublikanın bütün ümumtəhsil müəssisələrində olduğu kimi 261 nömrəli məktəb-liseydə də “Son zəng” tədbiri keçirilib.Tədbirdə məktəb-liseyin rəhbərliyi, Xətai Rayonu İcra Hakimiyyətinin baş məsləhətçisi Oruc Əbdürrəhmanov, müəllimlər, məzunlar və valideynlər iştirak ediblər. Tədbir Azərbaycan Respublikasının Dövlət Himninin səsləndirilməsi ilə başlayıb, vətən uğrunda canından keçmiş şəhidlərin ruhu 1 dəqiqəlik sükutla yad edilib. Salamlama nitqi ilə çıxış edən məktəb-liseyin direktoru Könül Məmmədli məzunları təbrik edib və onlara gələcək həyatlarında uğurlar arzu edib. Daha sonra məzunların ilk müəllimləri, sinif rəhbərləri va valideynlərə söz verilib.Tədbir məzunların hazırladıqları kompozisiyalarla davam edib. Sonda təhsil aldıqları müddətdə fərqlənən məzunlar məktəb rəhbərliyi tərəfindən fəxri fərmanlarla təltif olunublar.Qeyd edək ki, 2024-2025-ci tədris ilində məktəb-liseyin 11-ci sinfini 77 şagird bitirir.
