AZƏRBAYCANIN DÖVLƏT MÜSTƏQİLLİYİNİN BƏRPA EDİLMƏSİ XX ƏSRDƏ XALQIMIZIN ƏN BÖYÜK NAİLİYYƏTİDİR
26 aprel 2018-ci il tarixində 221 nömrəli tam orta məktəbdə Heydər Əliyev irsinin öyrənilməsi ilə əlaqədar 257 nömrəli tam orta məktəbin XI sinif şagirdləri və müəllimlərlə görüş keçirildi.Görüşdə 221 nömrəli tam orta məktəbin direktoru Fikrət Xəlilov,257 nömrəli tam orta məktəbin direktoru Qarat Qaratov və direktor müavini Yeganə Məhərrəmova “Azərbaycanın dövlət nüstəqilliyinin bərpa edilməsi XX əsrdə xalqımızın ən böyük nailiyyətidir. ” mövzusunda çıxış etdilər.
Yeganə Məhərrəmova çıxış edərək bildirib ki, Ümummilli Liderimizin qətiyyəti, cəsarəti, milli ideyalara bağlılığı nəticəsində hələ sovet dövründə gələcəyin müstəqil Azərbaycanı naminə cəsarətli addımlar atılıb. Belə ki, Azərbaycan dili rəsmi dövlət dili kimi təsbit edilib, iqtisadiyyat, elm, təhsil, mədəniyyət, səhiyyə və digər sahələrin inkişafında ciddi nailiyyətlər əldə olunub.
Qeyd edilib ki, Ulu Öndərin rəhbərliyi ilə 1990-1993-cü illərdə Naxçıvandan başlanan müstəqillik yolu Azərbaycanın siyasi mühitində aparıcı qüvvəyə çevrilib, milli dövlətçiliyimizin bərpası istiqamətində qəti addımların atılmasına gətirib çıxarıb. Dahi şəxsiyyətin təşəbbüsü və rəhbərliyi ilə Naxçıvan Muxtar Sovet Sosialist Respublikasının adından “sovet sosialist” sözlərinin çıxarılması, üçrəngli bayrağımızın ilk dəfə Naxçıvan Muxtar Respublikasının Dövlət Bayrağı kimi qəbul edilməsi və digər tarixi qərarlar müstəqillik yolunda irəliləyən Azərbaycanın dövlətçilik tarixində mühüm yer tutur. 1993-cü ilin iyun ayında xalqın təkidli tələbi ilə ikinci dəfə siyasi hakimiyyətə qayıdan ulu öndər Heydər Əliyevin qətiyyəti və əzmkarlığı sayəsində ölkə parçalanmaqdan, vətəndaş müharibəsindən qurtulub.
Vurğulanıb ki, dövlət quruculuğu sahəsində əldə olunmuş nailiyyətlər, qanunların aliliyinə söykənən vətəndaş cəmiyyətinin qurulması və sair bu kimi uğurlar Heydər Əliyev dühasının bəhrələridir. Məhz dahi liderin fəaliyyəti nəticəsində Azərbaycan Şərqlə Qərb arasında etibarlı körpü rolunu oynamağa başlayaraq dünyanın ən dinamik inkişaf edən ölkələrindən birinə çevrilib. Ümummilli lider Heydər Əliyevin “Azərbaycanın dövlət müstəqilliyi, milli azadlığı əbədidir və əbədi olacaqdır!” fikri indi dünya dövlətləri sırasında günbəgün mövqeyini gücləndirən müstəqil Azərbaycanın simasında bir daha öz təsdiqini tapır.
