Şəhid İqbal Babayevin xatirəsi yad edildi
İqbal Zəki oğlu Babayev 1995-ci il sentyabrın 10 -da Xətai rayonunda dünyaya göz açıb. Məktəbin məzunu olan İqbal 2018-ci ildə həqiqi hərbi xidmətə yollanır. Bir illik xidmətini Naxçıvanda başa vuraraq geri dönür. Qarabağ savaşı başlayan kimi, İqbal torpağını sevən bir gənc kimi Xətai rayon Hərbi Komissarlığına üz tutur və Vətən uğrunda döyüşmək üçün adını könüllülər sırasına yazdırır. Çağırış vərəqəsini alan qəhrəmanımız ön cəbhəyə yollanır. Cəbrayıl, Füzuli və Zəngilan istiqamətlərində gedən döyüşlərdə mərdliklə döyüşür. Oktyabrın 21-də şəhidlik zirvəsinə ucalır.
Bu gün məktəbdə İqbal Babayevin xatirəsi hörmət və ehtiramla yad edildi. Qonaqlar arasında Xətai rayonu İcra Hakimiyyətinin, rayon ictimayətinin nümayəndələri, şəhidin ailə üzvləri, müəllim və şagird kollektivi yer almışdı. Görüşü giriş sözü ilə açan məktəbin direktoru Qarat Qaratov şəhid məzunun döyüş qəhrəmanlığından söz açdı. Sonra şagirdlər şəhidin unudulmaz xatirəsinə həsr olunmuş şeirlər söylədilər. Görüşə gələn qonaqlar və şəhidin atası Zəki Babayev də İqbalın keçdiyi şərəfli döyüş yolundan bəhs etdi. Sonda məktəblilər gələn qonaqlarla birgə şəhidin xatirə lövhəsi önünə tər qərənfillər düzdülər.
