“Zəfər tarixi”- I konfrans
Bakı Şəhəri üzrə Təhsil İdarəsinin əmri ilə ümumi təhsil müəssisələrində 2022-ci ilin aprel-noyabr aylarında interaktiv şəkildə “Zəfər tarixi” adlı konfranslar təşkil edilir. Konfransların iştirakçıları ümumi təhsil müəssisələrinin tarix müəllimləri və 9-cu sinif şagirdləridir.
28 aprel 2022-ci il tarixində 257 nömrəli tam orta məktəbin akt zalında “Zəfər tarixi”nin l konfransı keçirildi.
Məqsəd şagirdləri Zəfər tariximiz barədə məlumatlandırmaq, Azərbaycanın ərazi bütövlüyü uğrunda vuruşan, şəhid olan qəhrəmanlarımızı şagirdlər arasında tanıtmaq, gənc nəsli vətənpərvərlik ruhunda tərbiyə etməkdir.
Konfrans iştirakçıları əvvəlcə Qarabağ müharibəsində həlak olan şəhidlərimizi 1 dəqiqəlik sükutla yad etdilər
Konfransda məktəbin “Zəfər tarixi” fənnini tədris edən müəllimləri 9-cu sinif şagirdlərinin iştirakı ilə Zəfər tariximiz barədə izləyicilərə məlumat verdilər. Sonra Azərbaycanın ərazi bütövlüyü uğrunda şücaət göstərərək şəhidlik zirvəsinə ucalmış oğullarımız barədə video- süjetlər nümayiş etdirildi.
Konfransın sonunda məktəbin direktoru yeniyetmə və gənclərin hərbi vətənpərvərlik tərbiyəsi işinin gücləndirilməsində və məktəblilərin hərbi xidmətə hazırlıq səviyyəsinin yüksəldilməsində əhəmiyyətli rolu olan “Şahinlər” hərbi-idman oyununda II yerin qalibi olmuş şagirdlərimizə "Fəxri Diplom" təqdim edərək onlara daha böyük uğurlara imza atmaq yolunda müvəffəqiyyətlər arzuladı.
