Şagirdlərimiz “Qiraətçi” verilişində
Ölkəmizdə məktəblilərin kitaba və mütaliəyə olan marağını gücləndirmək üçün bir çox tədbirlər görülür. Mütaliə şagirdlərin hərtərəfli inkişafına, onların mədəni səviyyəsinin və biliyinin artmasına, söz ehtiyatının zənginləşməsinə kömək edir.
Bu baxımdan Təhsil TV-də yayımlanan “Qiraətçi” verilişinin də gördüyü işlər təqdirə layiqdir. Şagirdlər tərəfindən çox sevilən bu verilişin 02 fevral tarixindəki buraxılışında məktəbimizin Azərbaycan dili və ədəbiyyatı müəllimi Abbasova Yeganə və dərs dediyi 6”B” sinif şagirdləri qonaq olublar. Onlar “Heraklın 12 qoçaqlığı” əfsanəsini müzakirə ediblər. Şagirdlər Yeganə müəllimin və verilişin aparıcısı Gülnarə İlhamın onlara verdiyi bütün sualları düzgün cavablandıraraq qədim Yunan ədəbiyyatının qəhrəman obrazı Heraklın digər qoçaqlıqları barədə də danışıblar.
Sonda aktyorluq qabiliyyəti olan şagirdlər əsərdən səhnələşdirdikləri “Herakl və Atlantın” görüşü hissəsini nümayiş etdiriblər. Maraqlı çıxışlarına görə istedadlı şagirdlərimizi təbrik edir və onlara bol-bol uğurlar arzulayırıq.
