VI "A" sinfinin şagirdləri Fəxri Xiyabanda oldular
10 oktyabr 1997-ci il tarixi Vətən müharibəsində şəhidlik zirvəsini fəth etmiş Kərimli İsmayıl Ceyhun oğlunun anadan olduğu gündür.
Şəhidin adını daşıyan "Vl "A" sinfinin şagirdləri Fəxri Xiyabanda oldular və Kərimli İsmayılın qəbrini ziyarət etdilər.
Kərimli İsmayıl 1997-ci il oktyabrın 10-da Bakı şəhərində anadan olub. 2015-2019-cu illərdə Azərbaycan Memarlıq və İnşaat Universitetində ali təhsil alıb. Subay idi. İsmayıl 2019-2020-ci illərdə Azərbaycan Silahlı Qüvvələrinin "N" saylı hərbi hissəsində müddətli həqiqi hərbi xidmətdə olub. Azərbaycan Ordusunun əsgəri olan Kərimli İsmayıl 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Şuşanın azadlığı uğrunda gedən döyüşlərdə qəhrəmancasına savaşıb. Hadrud döyüşləri zamanı döyüş yoldaşlarının əhatəyə aldığı səngərə daxil olub və Ermənistan Silahlı Qüvvələrinin bir neçə əsgərini öldürüb. İsmayıl Kərimli noyabrın 4-də Daşaltı istiqamətində döyüş yoldaşlarını xilas edən zaman ağır yaralanıb və şəhidlik zirvəsinə ucalıb. II Fəxri Xiyabanda dəfn olunub. Azərbaycan Respublikasının ərazi bütövlüyü uğrunda aparılan döyüş əməliyyatlarında iştirak etdiyi və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən ölümündən sonra "Vətən uğrunda", 29.12.2020-ci il tarixli Sərəncamına əsasən "Şuşanın azad olunmasına görə", 25.12.2020-ci il tarixli Sərəncamına əsasən "Xocavəndin azad olunmasına görə", 30.12.2020 -ci il tarixli Sərəncamına əsasən isə "Hərbi xidmətlərə görə" medalları və 05.11.2022 ci il tarixli Sərəncamına
"3-cü dərəcəli Vətənə xidmətə görə" ordeni ilə təltif olunmuşdur.
Şəhidimizi ehtiramla və sevgi ilə anırıq.
