2023/2024-cü dərs ilinin ilk zəngi çalındı
15 sentyabr – Bilik Gününə həsr olunmuş tədbirdə qonaq qismində Bakı Şəhəri üzrə Təhsil İdarəsinin müdiri Mehriban Vəliyeva, Media və ictimaiyyətlə əlaqələr sektorunun müdiri Bəşarət Məmmədov, Nəsimi Rayonu İcra Hakimiyyətinin Ərazi idarəetmə və yerli özünüidarəetmə sektorunun müdiri Elnur Əliyev, İctimai-siyasi və humanitar məsələlər şöbəsinin məsləhətçisi Emin Hüseynov, məktəbin adını daşıdığı şəhid Abdulla Rəhimovun ailə üzvləri: Bayram Rəhimov, Sevinc Rəhimova, 44 günlük Vətən müharibəsində şəhid olan məzun İsmayıl Kərimovun ailə üzvləri: Ceyhun Kərimov və Rəna Kərimova iştirak etdilər. Məktəbin direktoru Sitarə Abbasova Bilik Gününə həsr olunmuş tədbiri Dövlət Himni ilə açıq elan etdi. Torpaqlarımızın bütövlüyü uğrunda şəhid olan Vətən oğullarının xatirəsi 1 dəqiqəlik sükutla anıldı. Söz Mehriban xanım Vəliyevaya verildi. Mehriban xanım yeni dərs ili münasibətilə heyəti təbrik etdi, məktəbin öhdəsinə düşən vəzifələrin həyata keçirilməsində uğurlu fəaliyyət arzu etdi, qarşıda duran hədəflərdən və bu hədəflərə çatmanın yollarından danışdı. Digər qonaqlar və şəhid ailə üzvləri də ürək sözlərini bildirdilər. Bədii hissədə birincilər şeirlər səsləndirdi, mahnılar və rəqslər ifa etdilər. İlk zəngin sədaları altında şagirdlər sinif otaqlarına daxil oldular.
Daha sonra "Ümummilli lider Heydər Əliyev Azərbaycan dövlətinin xilaskarı və yaradıcısıdır" mövzusunda ilk dərslər dinlənildi. Mehriban xanım Vəliyeva məktəblilərlə, pedaqoji heyətlə söhbət apardı, tövsiyələrini verdi.
