Lütfi Zadənin məzarı ziyarət edildi
20 iyun tarixində məktəbin müəllimləri və şagirdləri tərəfindən Azərbaycan xalqının fəxri, qeyri-səlis məntiq nəzəriyyəsi ilə dünya elminə misilsiz töhfə vermiş görkəmli alim Lütfi Zadənin məzarı ziyarət edildi. Lütfi Zadə birinci Fəxri Xiyabanda dəfn edilmişdir. Müəllimlər tərəfindən dünya şöhrətli alim haqqında şagirdlərə geniş məlumat verildi. Qeyd edək ki, bu il alimin anadan olmasının 100 illiyi tamam olur.
Lütfi Zadə fundamental nəzəriyyələri ilə elm tarixində ciddi dəyişikliklərə yol açmış görkəmli şəxsiyyətlərdəndir. Alimin ardıcıl tədqiqatlarının nəticəsi olaraq irəli sürdüyü qeyri-səlis məntiq nəzəriyyəsi müxtəlif elm sahələrinin müasir mərhələdə inkişafında dərin iz qoymuş və yeni yanaşma üsulları meydana gətirmişdir. Bu nəzəriyyə üstün intellektual texnologiyalara güclü təsir göstərmiş, müasir idarəetmə və informasiya-kommunikasiya sistemlərinin əsaslarının formalaşdırılmasında mühüm rol oynamışdır.
