İrəvan Müəllimlər Seminariyasının yaranmasının 140 illiyi qeyd olunub
Martın 7-də məktəbin kitabxanasında kitabxana müdiri Mətanət Salmanovanın təşəbbüsü, məktəbin tərbiyə işləri üzrə direktor müavini Yaqut İslamovanın və məktəbin Azərbaycan dili və ədəbiyyatı müəllimi Ülviyə Xudiyevanın təşkilatçılığı, məktəbin 8 “C” və 8 “D” sinif şagirdlərinin iştirakı ilə İrəvan Müəllimlər Seminariyasının yaranmasının 140 illiyinə həsr olunmuş dəyirmi masa keçirilib.
Şagirdlərə Azərbaycanın görkəmli ədəbiyyatşünas alimi, tanınmış maarifpərvər, ictimai xadim, publisist-yazıçı, tənqidçi və tərcüməçi Firidun bəy Köçərlinin həyat və yaradıcılığı haqqında geniş məlumat verilib. Bildirilib ki, Firidun bəy Köçərli seminariyanın ilk müəllimlərindən olub, geniş mədəni-maarif işləri aparıb. Seminariyanın bir çox tanınmış şəxsiyyətlərinin yetişməsində onun xüsusi xidmətləri olub.
