236 №-li tam orta məktəb

Aprelin 17-də məktəbin akt zalında Milli Müdafiə Universitetinin nümayəndələrinin şagirdlərlə görüşü keçirilib. Görüşdə Milli Müdafiə Universitetinin professoru, tarix elmləri doktoru, ehtiyatda olan polkovnik Nurulla Əliyev, məktəbin direktoru Xanlar İmaməliyev, məktəbin gənclərin çağırışaqədərki hazırlığı rəhbəri - 44 gün davam edən Vətən müharibəsinin iştirakçısı polkovnik-leytenant Eldəniz Niftiyev və məktəbin 9-11-ci sinif şagirdləri iştirak ediblər. Əvvəlcə xalqımızın Ümummilli Lideri Heydər Əliyevin və ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib. Tədbirdə çıxış edənlər bildiriblər ki,  Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Ordumuz 44 günlük Vətən müharibəsi zamanı tarixi Zəfərə imza atıb, torpaqlarımız işğaldan azad olunub, 30 illik həsrətə son qoyulub. Bu möhtəşəm Qələbə sonrakı zəfərlərə yol açıb. Bu il sentyabrın 19-da 24 saatadək davam edən antiterror tədbirləri nəticəsində Qarabağdakı qeyri-qanuni erməni silahlıları təslim olub, suverenliyimiz tam təmin olunub. Oktyabrın 15-də Prezident, Müzəffər Ali Baş Komandan İlham Əliyev Xankəndi, Ağdərə, Xocalı, Xocavənd şəhərlərində, Əsgəran qəsəbəsində və Sərsəng su anbarının ərazisində üçrəngli bayrağımızı qaldırmaqla tariximizin ən şanlı səhifələrini yazıb.

Daha sonra Milli Müdafiə Universitetinin professoru, tarix elmləri doktoru, ehtiyatda olan polkovnik Nurulla Əliyev çıxışında bildirib ki, görüşün əsas məqsədi şagirdləri Azərbaycan Ordusunda həyata keçirilən yeniliklər, Müdafiə Nazirliyinin strukturuna daxil olan xüsusi təyinatlı ali məktəblərin fəaliyyəti ilə tanış etmək, gələcəkdə karyerasını zabit kimi davam etdirmək istəyən gənclərə dəstək olmaqdır. O, şagirdlər üçün xidmət növləri, imtiyazlar, Müdafiə Nazirliyi sisteminə daxil olan xüsusi təyinatlı ali məktəblərdəki ixtisaslar, müraciət qaydaları barədə ətraflı məlumat verib.

Görüşdə, həmçinin hərbi məktəblər haqqında videoçarxlar izlənilib, şagirdləri maraqlandıran suallar cavablandırılıb.

Martın 18-də məktəbin direktoru Xanlar İmaməliyev məktəbin 2 “D” sinif şagirdləri Azərbaycan Silahlı Qüvvələrinin mayoru, Vətən müharibəsinin şəhidi Əhədzadə İlkin Qələmşah oğlunun övladı Əhədzadə Uğur İlkin oğlu və şəhidin qardaşı oğlu Əhədzadə Ülvi Elvin oğluna və eyni zamanda qəhrəman şəhidimiz Əliyev Səbuhi Tahir oğlunun övladları məktəbin 0 “D” məktəbəhazırlıq qrupunun şagirdi Əliyev Uğur Səbuhi oğlu və məktəbin 2 “Ç” sinif şagirdi Əliyeva Xatirə Səbuhi qızına qarşıdan gələn Novruz bayramı münasibəti ilə hədiyyələr təqdim edib.

Xanlar İmaməliyev şəhid övladlarını bayram münasibətilə təbrik edərək Vətənini hər şeydən uca tutan qəhrəmanlarımızın övladları ilə bayramı birlikdə qarşıladığına görə çox məmnun olduğunu qeyd edib.

Şahmat yarışlarında daim öz rəqiblərini mat qoyan məktəbin 7 “Ə” sinif şagirdi Paşam Əlizadə bu dəfə su voleybolu idman növü üzrə 17 mart tarixində Bakı Oksford məktəbində keçirilən komanda yarışında çempionluq uğrunda sona qədər mübarizə apararaq birinci yerə layiq görülüb.

Paşam Əlizadəyə diplom və birincilik medalı təqdim edilib.

Martın 19-da 2023–2024-cü tədris ili üçün ümumtəhsil məktəblərinin 6-7-ci sinif şagirdləri arasında (fizika, kimya, biologiya, riyaziyyat, informatika və təbiət fənləri üzrə) keçirilən respublika fənn müsabiqələrinin və 5-ci sinif şagirdləri arasında keçirilən Lütfi Zadə adına Riyaziyyat-məntiq Olimpiadasının rayon (şəhər) mərhələsinin nəticələri açıqlanıb.

236 nömrəli tam orta məktəbin adları aşağıdakı cədvəldə qeyd olunan şagirdləri müsabiqənin 1-ci turunda qalib olaraq 2-ci turuna vəsiqə qazanıblar.

Bakı Şəhəri üzrə Təhsil İdarəsi tərəfindən “Yaşıl dünya naminə həmrəylik ili”nə həsr olunmuş “Bütöv Azərbaycana ilk bahar gəlir” adlı bayram festivalı keçirilib.

Paytaxtdakı 229 nömrəli tam orta məktəbdə təşkil olunan festivalda Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin (BŞTİ) müdiri vəzifəsini müvəqqəti icra edən Nərminə Hüseynova, millət vəkilləri Sadiq Qurbanov, Məlahət İbrahimqızı, İltizam Yusifov, Könül Nurullayeva, Səbinə Xasayeva, Elm və Təhsil Nazirliyinin Daxili nəzarət şöbəsinin müdir müavini Kamran İsmayılov, Nizami Rayon İcra Hakimiyyəti başçısının müavini İldırım Mehdiyev, şair Baba Vəziroğlu, BŞTİ-nin struktur bölmə rəhbərləri, Nizami Rayonu İcra Hakimiyyətinin nümayəndələri, məktəb direktorları, məktəbdənkənar təhsil müəssisələrinin rəhbərləri, müəllimlər və şagirdlər iştirak ediblər.

Öncə qonaqlar festival çərçivəsində keçirilən ağacəkmə aksiyasında iştirak ediblər.

Daha sonra Novruz adət-ənənələrini canlandıran və müxtəlif bölgələrimizi tərənnüm edən guşələrə baxış keçirilib.

Çıxış edənlər festival iştirakçılarını xalqımızın milli bayramı olan Novruz münasibətilə ürəkdən təbrik edib, firavanlıq və xoş günlər arzulayıblar. Bildirilib ki, digər illərdən fərqli olaraq bu il Novruz bayramı ərazilərinin tam suverenliyinə nail olmuş Azərbaycanda qeyd edilir. Uzun illər sonra bütöv Azərbaycanın Novruzu qeyd etməsini Ali Baş Komandan İlham Əliyevin böyük sərkərdəlik məharətinə, güclü iradəsinə və qətiyyətinə, müzəffər və yenilməz ordumuzun şücaətinə borcluyuq.

Qeyd olunub ki, BŞTİ-nin tabeliyindəki ümumi təhsil müəssisələrində xalqımızın qədim tarixini, milli adət və ənənələrini  gənc nəslə daha yaxından tanıtmaq, təbliğ etmək məqsədilə müxtəlif tədbirlər keçirilir. Bu istiqamətdə reallaşdırılan “Dəyərlərimizi qoruyaq!” layihəsi çərçivəsində təşkil olunan “Bütöv Azərbaycana ilk bahar gəlir” adlı bayram festivalı milli-mənəvi dəyərlərimizə, tariximizə, köklərimizə nə qədər bağlı olmağımızın bariz nümunəsidir.

 Tədbir iştirakçıları festivalın “Yaşıl dünya naminə həmrəylik ili”nə həsr olunmasını yüksək qiymətləndiriblər. Bildiriblər ki, şagirdlərin burada səsləndirdikləri mahnılar və şeirlər, həm də ətraf mühitin sağlamlaşdırılması, yaşıllıqların bərpası və artırılması ilə bağlı ötürülən gözəl mesajlardır.

Tədbirdə şagirdlər və Uşaq-Gənclər İnkişaf mərkəzlərinin dərnək üzvləri baharın təravətli nəfəsini özü ilə gətirən Novruz bayramına aid mahnılar ifa edib, yallı gedib, şeirlər səsləndirib, maraqlı səhnəciklər və digər özfəaliyyət bacarıqlarını nümayiş etdiriblər.

Sonda məktəbin həyətində bayram tonqalı qalanıb və qonaqlar şagirdlərlə birgə “Cəngi” sədaları altında dövrə vurublar.