"Tarix yazan igidlər" adlı sinif saatı
Vətən, torpaq, yurd sevdalı oğullar Vətən müharibəsində qan tökərək, şirin canlarına qıyaraq uzun illər ərzində erməni işğalı altında inildəyən torpaqları azad etdilər. Bu müqəddəs amal uğrunda şəhid oldular, heç kirpiklərini belə qatlamadılar, zamanın və tarixin fövqünə ucaldılar və ən ali məqama yüksəldilər. Bu torpaqların hər qarışına şəhid qanı tökülüb, onların cəsarəti və hünəri yurd yerlərimizə yeni bir həyat gətirib. Əsgər və zabitlərimiz Ali Baş Komandan İlham Əliyevin rəhbərliyi altında Azərbaycanın Zəfər tarixini yazdı. Müzəffər hərbçilərimiz dünyanın gözü qarşısında yeni dövrün müharibəsini qələbə ilə başa çatdırdılar. Qürur hissi ilə deyə bilərik ki, 44 günün hər anı, hər saniyəsi, hər dəqiqəsi qəhrəmanların qazandıqları Qələbə və Zəfər günü kimi yaddaşlara həkk olunub.
29 sentyabr 2023-cü il tarixində Ayşən Rzayeva V sinif şagirdləri ilə birgə “Tarix yazan igidlər” adlı sinif saatı təşkil etdi. Şəhidlərin əziz xatirəsi bir dəqiqəlik sükutla yad edildi. Mövzu ilə əlaqədar olaraq videoçarx və şagirdlərin hazırladıqları maraqlı kompozisiya izlənildi. Şəhidlərin adı və qəhrəmanlığı əbədi yaşayacaq, tariximizin ən şərəfli səhifəsini qanları ilə yazan oğulların parlaq xatirəsi heç zaman unudulmayacaq.
