Ulu öndər Heydər Əliyevin anadan olmasının 100-cü ildönümünə həsr olunmuş tədbir keçirildi
8 may 2023-cü il tarixində məktəbin AKT zalında ulu öndər Heydər Əliyevin 100-cü ildönümünə həsr edilmiş tədbir keçirildi. Tədbirdə məktəbin direktoru Lamiyə Quliyeva, Pirallahı rayon ictimai-siyasi və humanitar məsələlər üzrə şöbə müdirinin müavini Loğman Müslümov, Qızıl Aypara Cəmiyyətinin Pirallahı rayon bölməsinin sədri Təranə İskəndərova iştirak edirdilər. Tədbiri giriş sözü ilə açan direktor Lamiyə Quliyeva Azərbaycan dövlətçiliyinin söykəndiyi təməl prinsiplərinin Heydər Əliyev tərəfindən yaradıldığını qeyd etdi. Bildirdi ki, ulu öndər Heydər Əliyev özünün fəaliyyəti və qətiyyətli qərarları ilə müstəqilliyimizin formalaşmasında, ölkədə sabitliyin əldə olunmasında, həmçinin, Azərbaycanın dünya ölkələri arasında nüfuzunun yüksəldilməsində müstəsna xidmətlər göstərib. Məhz buna görə də, xalqımız Ümummilli Lideri müasir müstəqil Azərbaycan dövlətinin memarı, qurucusu adlandırıb. Ulu Öndərin layiqli davamçısı möhtərəm Prezidentimiz cənab İlham Əliyevin sayəsində bunun artıq reallıq olduğunu vurğuladı.
Sonra çıxış edən Pirallahı rayon ictimai-siyasi və humanitar məsələlər üzrə şöbə müdirinin müavini Loğman Müslümov Ulu Öndərin dövlətçilik səriştəsi və bacarığı ilə qarşıya çıxan bütün çətinliklərə baxmayaraq, Azərbaycanı olduqca mürəkkəb zamanın dalğaları arasından salamat çıxardığını, ona həm bölgədə, həm də dünyada layiqli yer qazandırdığını vurğuladı və ölkəmizin əldə etdiyi nailiyyətləri diqqətə çatdırdı.
Daha sonra çıxış edən, Qızıl Aypara Cəmiyyətinin Pirallahı rayon bölməsinin sədri Təranə İskəndərova Heydər Əliyevin keçdiyi böyük və şanlı tarixi yolundan ətraflı danışdı. Həm birinci hakimiyyəti dövründə, həm də ikinci dəfə hakimiyyətə gəldiyi vaxt Azərbaycan xalqına bəxş etdiyi zəngin zəhmətinin bəhrələrindən tədbir iştirakçılarına məlumat verdi. O qeyd etdi ki, məhz Heydər Əliyevin sayəsində sivilizasiyalı, demokratik və hüquqi cəmiyyət qurulmuş, yeni konstitusiya qəbul edilmiş, Azərbaycan Avropa şurasının üzvlüyünə daxil olmuşdur. Digər bütün nailiyyətlərə Heydər Əliyevin sayəsində nail olunduğunu qeyd etmişdir. Tədbir şagirdlərin hazırladıqları kompozisiya ilə davam etdi. Sonda xatirə şəkilləri çəkildi.
