“Xarici dil fənn aylığı”nın səmərəli təşkili
Son illər ölkəmizdə xarici dillərin, xüsusən də beynəlxalq statuslu ingilis dilinin tədrisinə diqqət artıb. Xarici dillərin tədrisinin I sinifdən başlayaraq aparılması, tədris planlarında ona ayrılan saatların artırılması, fənnin tədrisinə yeni yanaşmaların tətbiqi, mövcud kurikulumda əvvəlki tədris proqramlarından fərqli daha zəngin məzmunun əhatə olunması, yeni standartlar bunu təsdiq edir. Məktəbdə tədrisin səmərəli təşkili, bu sahədəki qabaqcıl təcrübənin öyrənilib ümumiləşdirilməsi və yayılması, tədris prosesində innovativ yanaşmalardan, müasir təlim üsulları və texnologiyalarından istifadə məsələləri diqqət mərkəzindədir. Bu məqsədlə məktəbin direktoru Lamiyə Quliyeva öz ixtisası üzrə “İngilis dili aylığı”nda maraqlı ideya irəli sürərək, böyük tənəffüsdə proyektor vasitəsi ilə dəhlizlərdə şagirdlər üçün, ingilis dilində nağıllar və musiqilər nümayiş etdirərək, onlarda bu dilə maraq oyatmağa nail oldu. Əldə olunan müsbət nəticələr pedaqoji kollektivə növbəti tədbirləri daha maraqlı və rəngarəng təşkil etməklə toplanan təcrübəni zənginləşdirməyə imkan verdi.
