Pirallahı rayonu Gürgən qəsəbəsindən olan şəhid İlqar Məcidovun ailəsi ilə onlayn görüş keçirildi
05 yanvar 2021-ci il tarixində Pirallahı rayonu Gürgən qəsəbəsindən olan şəhid İlqar Məcidovun ailəsi ilə onlayn görüş keçirildi. Tədbirdə şəhidin ailəsi, tərbiyə işləri üzrə direktor müavini Elza Cəfərova, hərbi rəhbər Fazil Ağayev və bir qrup şagird iştirak etdi. Onlayn qaydada təşkil olunan iclası giriş sözü ilə tərbiyə işləri üzrə direktor müavini Elza Cəfərova açıb. Əvvəlcə torpaqlarımızın suverenliyi, ərazi bütövlüyü uğrunda şəhid olanların xatirəsi bir dəqiqəlik sükutla yad edildi. Tədbirdə Ermənistanın Azərbaycana qarşı elan olunmadan başladığı müharibədən, müharibənin ağrı-acılarından, 1992-ci il fevralın 25-dən 26-na keçən gecə Xocalıda törətdiyi faciədən danışıldı.
Şəhidin bacısı İradə İsayeva 1992-ci ildə Füzulinin Qacar kəndində şəhid olanqardaşı İlqar Məcidovun keçdiyi şərəfli döyüş yolundan ətraflı məlumat verərək, onun Vətənə olan sevgisi haqqında danışdı. Daha sonra çıxış edən tədbir iştirakçıları Azərbaycanın müstəqilliyi uğrunda şəhid olanların xatirəsinin yad edilməsinin mənəvi borc olduğunu diqqətə çatdırdılar və bildirdilər ki, Vətən uğrunda şəhid olmuş qəhrəman oğullarımızın qanı yerdə qalmadı. Müzəffər Ali Baş Komandan İlham Əliyev və Ordumuzun mərd əsgərləri sayəsində torpaqlarımız işğaldan azad edildi. Çıxışlardan sonra şagirdlər bu mövzuda hazırladıqları şeirləri söylədilər.
Sonda tədbir iştirakçıları şəhidlərimizə Allahdan rəhmət dilədilər.
