Bakı Beynəlxalq Kitab Sərgi-Yarmarkası
Azərbaycan Respublikası Mədəniyyət və Turizm Nazirliyinin təşkilatçılığı ilə 2019-cu il 27-29 sentyabr tarixləri arasında Bakı İdman Sarayında "Bakı Beynəlxalq Kitab Sərgi-Yarmarkası" 6-cı dəfə öz qapılarını kitabsevərlərin üzünə açıb. VI Bakı Beynəlxalq Kitab sərgisi böyük Azərbaycan şairi və mütəfəkkiri İmadəddin Nəsiminin 650 illiyinə həsr olunub.
Bildiyimiz kimi Azərbaycan Respublikası Təhsil Nazirliyinin əmrinə əsasən 2019-2020-ci tədris ilində ümumtəhsil müəssisələrində ilk dərs məşğələlərindən biri də “Mütaliə-mənəvi zənginliyə aparan yol” mövzusuna həsr olunmuşdur. Mövzunun səmərəli keçirilməsini təmin etmək məqsədilə 28 sentyabr tarixində məktəbin 5 "A" sinif şagirdləri sinif rəhbərləri Gülnar Cəfərzadə və valideynləri ilə kitab sərgisinə yollandılar.
Şagirdlər VI Bakı Beynəlxalq Kitab Sərgisi günləri çərçivəsində "bir kitab al bir can qurtar" aksiyasında iştirak edərək 2 yaşlı leykoz xəstəsi bir körpənin müalicəsi üçün bir kitab alaraq ona maddi və mənəvi dəstək oldular.
Sərgini gəzərkən şagirdlər orada olan müxtəlif kitablarla tanış oldular, eyni zamanda orada təşkil olunmuş aksiyaya qoşularaq xeyirxah bir addım atdılar. Həm şagirdlər, həm də valideynlər gəzintidən xoş təəssüratlarla ayrıldılar.
