Azərbaycan Dillər Universitetinə ekskursiya
4 aprel tarixində ADU-nun Filologiya və Jurnalistika fakültəsinin nəzdində Xarici dillərin tədrisi metodikası kafedrasının müəllimi, metodist İlhamə İsgəndərovanın rəhbərliyi ilə təcrübəçi tələbələr-Məmmədli Şəlalə və Ələsova Ayselin təhkim olunduqları 7 “C” sinfinin şagirdləri Azərbaycan Dillər Universitetində ekskursiyada olublar.
Əlavə təhsil və təcrübə fakültəsinin dekanı Məmməd İsmayılovun müşayiəti ilə universitetin tanıtımı çərçivəsində şagirdlər rektorun iş otağı ilə tanış edilmiş, onlarla bir sıra səlahiyyətli şəxslər-Tədris məsələləri üzrə prorektor Əfqan Abdullayev, Sosial məsələlər və ictimaiyyətlə əlaqələr üzrə prorektor Tamam Cəfərova, həmçinin müxtəlif kafedraların rəhbərləri səmimi söhbət etmiş, şagirdləri maraqlandıran sualları cavablandırmış, xatirə fotoşəkilləri çəkdirmişlər.
Şagirdlər ADU-da mövcud olan Konfutsi institutunun, Çin, Yapon, İndoneziya mərkəzlərinin fəaliyyəti ilə yaxından tanış olmuş, Amerika Təhsil Mərkəzində (American Studies Center) mövcud olan və şagirdlərin də yararlana biləcəyi proqramlar, maraqlı layihələr barədə geniş məlumatlandırılmışlar. ADU-nun Xəlifə rektoru və Xəlifə Tələbə Həmkarlar sədri ilə görüşən şagirdlər üçün adıçəkilən ekskursiya böyük motivasiya və xoş təəssüratlar mənbəyi oldu. Onlardan bir çoxu gələcəkdə ADU-da təhsil almaq arzusunda olduqlarını dilə gətirdilər.
