Milli Qəhrəmanlarımız and yerimizdir
07.02.2018-ci il tarixdə məktəbimizdə ibtidai siniflər üzrə direktor müavini X.Kərimova, məktəbin psixoloqu S.İsmayılova və ibtidai sinif müəllimi X.Hüseynovanın təşəbbüsü ilə Milli Qəhrəman Mübariz İbrahimovun ad günü ilə bağlı IVb sinfində “Milli Qəhrəmanlarımız and yerimizdir” adlı sinif tədbiri keçirildi. Tədbirdə iştirak edən müəllim və şagirdlər vətənin azadlığı uğrunda canından keçən Milli Qəhrəmanlarımız, onların vətən üçün qazandıqları azadlığın dəyərindən bəhs etdilər. 2010-cu ildə “ilin adamı” seçilmiş, Azərbaycanın Milli Qəhrəmanı, vətəni canından çox sevən və bu yolda şəhidlik zirvəsinə ucalan Mübariz İbrahimovun keçdiyi şərəfli həyat yolu iştirakçılar tərəfindən bir daha fəxrlə xatırlandı. Bu qəhrəman Azərbaycan oğlunun valideynlərinə yazdığı məktub oxundu, onun haqqında yaxınlarının və doğmalarının söylədiyi fikirlər əks olunan videoçarx izlənildi. Məktəbin direktoru V.Babayev tədbirdə çıxış edərək Mübariz İbrahimovun Vətən qarşısında xidmətlərini yüksək qiymətləndirdi, şəhidlərimizin şərəfli həyat yolunun şagirdlər üçün bir məktəb olduğunu qeyd etdi.Tədbirdən sonra iştirakçılar II Fəxri Xiyabana gedib Milli Qəhrəman Mübariz İbrahimovun məzarı önünə gül-çiçək dəstələri qoydular, qəhrəman Vətən oğlunu dünyaya gətirən Şamama ana ilə görüşdülər. Şagirdlər Mübariz İbrahimova həsr olunmuş şeirlər söyləyib, Vətəni onun kimi ürəkdən sevəcəklərinə, lazım gəlsə, onun yolunda şəhid olacaqlarına and içdilər.
