Firudin bəy Köçərli adına Respublika uşaq kitabxanasına ekskursiya
Bildiyimiz kimi bu il İrəvan gimnaziyasının 140 yaşı tamam olur. Bununla bağlı məktəbimizdə bir sıra tədbirlər həyata keçirildi.
Firudin bəy Köçərlinin 1885-ci ildən həmin gimnaziyanın müəllimi kimi çalışmasını,İrəvan gimnaziyasında təhsil alan gənclərə ata qayğısı göstərməsini, böyük müəllim nüfuzuna malik olmasını nəzərə alaraq şagirdlərimizə onun fəaliyyəti haqqında daha geniş məlumat vermək üçün Firudin bəy Köçərli adına uşaq kitabxanasına getməyi qərara aldıq.
Məktəbimizin kitabxana müdiri Ülviyyə Fərəcova, kitabxana işçisi Rayihə Yusifova və Azərbaycan dili, ədəbiyyat müəllimi Elnarə Zeynalovanın təşkilatçılığı ilə 7 "Ç" və 8 "C" sinif şagirdləri kitabxanaya getdi.
Kitabxanada şagirdlərimiz böyük oxu zalında, dəyirmi masa ətrafında əyləşərək Firudin bəyin həyat-yaradıcılığı ilə bağlı sənədli filmə tamaşa etdilər. Sonra isə şagirdlərimizin hazırladığı təqdimatlar dinlənildi. Sonda 8 "C" sinif şagirdi Mirzəyeva Nəzrinin İrəvan gimnaziyası haqqında hazırladığı videoçarx nümayiş olundu.
