21 №-li tam orta məktəb

Bakı Şəhəri üzrə Təhsil İdarəsinin tabeliyindəki ümumi təhsil müəssisələrinin şagirdləri Qazaxıstan universitetlərinin təhsil sərgisinə baxış keçiriblər.

Məktəblilərin sərgi ilə yaxından tanış olması onların dünyagörüşünün inkişafı, elmi-tədqiqatlara və təhsilə marağının artırılması, yeni təhsil imkanları ilə tanış olmaları baxımından mühüm əhəmiyyət kəsb edir.

Bakı İdman Sarayında keçirilən sərgidə məktəblilər Qazaxıstanda müxtəlif təhsil səviyyələri və ixtisas istiqamətləri üzrə ali məktəblərin təhsil imkanları barədə məlumat əldə etmək şansı qazanıblar.

Qeyd edək ki, sərginin əsas məqsədi Qazaxıstan universitetlərini Azərbaycan ictimaiyyətinə tanıtmaq və iki ölkə arasında təhsil sahəsində əməkdaşlığı gücləndirməkdən ibarətdir. Təhsil sərgisində Qazaxıstan Respublikasının 20-dən çox ali təhsil müəssisəsi iştirak edir.

Milli-mənəvi sərvətimizdən, mənəviyyatımızdan bəhs olunanda, ilk növbədə ana dilimiz yada düşür. Əgər bir xalqın ana dili yoxdursa, demək, həmin xalqın özü də yoxdur. Bizim milli birlik və həmrəyliyimizi təmin edən ana dilimizi qorumaq, inkişaf etdirmək və yaşatmaq hər bir azərbaycanlının vətəndaşlıq borcudur. Məktəbdə 21 Fevral Beynəlxalq Ana Dili Gününə həsr olunmuş tədbirlər keçirilib. Bu Tədbirlərdən biri də ana dili müəllimi Maral Quliyevanın "Dilimiz mənəvi varlığımızdır" adlı tədbir olub. Tədbirdə Maral müəllim Beynəlxalq Ana Dili Gününün tarixindən, bu günün əhəmiyyətindən danışıb, dilimizin keçdiyi inkişaf mərhələlərinə nəzər salıb. Bildirib ki, ana dili xalqın varlığını təmin edən amillərdən biri, insanın, bütövlükdə millətin, xalqın mənəviyyat aynasıdır. Hər bir xalqın milliliyini, mənəvi dəyərlərini yaşadan, inkişaf etdirən onun dilidir. Ana dilimiz xalqımızın, müstəqil Azərbaycanın ən böyük milli sərvətidir. Bu dil Azərbaycan xalqının fikrinin, düşüncəsinin, əqidə və məsləkinin, milli ruhunun ifadəsidir. Xalqımız əsrlər boyu böyük sınaqlardan, çətinliklərdən keçib, ancaq öz mənliyini, milliliyini, dilini itirməyib. Biz müstəqil dövlətin, azad xalqın nümayəndəsi kimi doğma dilimizlə, Azərbaycan dili ilə fəxr edirik. Sonra məktəblilər ana dilinə həsr olunan ədəbi-bədii kompozisiya nümayiş etdirib, dil haqqında şeirlər, hikmətli kəlamlar səsləndriblər.

2025-2026-cı tədris ili üzrə paytaxt məktəblərində birinci sinfə elektron qeydiyyat prosesinə hazırlıq çərçivəsində mikroərazilər üzrə ünvanların dəqiqləşdirilməsi ilə bağlı 76 vətəndaş müraciəti cavablandırılıb və müvafiq qaydalara uyğun şəkildə icra olunub.

12-18 fevral tarixlərində valideynlər müvafiq məsələlərlə bağlı Bakı Şəhəri üzrə Təhsil İdarəsinin (BŞTİ) Çağrı Mərkəzinə (146-1 nömrəli), [email protected] elektron poçtuna, 5, 6 və 7 saylı “ASAN xidmət” mərkəzlərinin təhsil xidmətləri bölməsinə müraciət ediblər.

Qeyd edək ki, I sinfə elektron qeydiyyat prosesi ilə bağlı məktəblərin mikroərazi üzrə ünvanları vətəndaşlara açıqlanıb. I sinfə elektron qeydiyyatla bağlı mikroərazilər müvafiq icra hakimiyyət orqanlarının təqdim etdikləri dislokasiyaya uyğun olaraq müəyyənləşdirilib.

Vətəndaşlar müvafiq linkə daxil olaraq daimi qeydiyyat ünvanının (yeni inşa olunmuş binalarda “Azərişıq” ASC-nin abonent kodu öz adına olan evlərin ünvanının) dislokasiyada olmasını dəqiqləşdirməlidirlər. Daimi qeydiyyat ünvanı (yeni inşa olunmuş binalarda “Azərişıq” ASC-nin abonent kodu öz adına olan evlərin ünvanı) dislokasiyada olmayan valideynlər müvafiq formanı doldurub, martın 3-nə kimi 5, 6 və 7 saylı “ASAN xidmət” mərkəzlərinin təhsil xidmətləri bölməsinə yaxınlaşaraq və ya [email protected] elektron poçtuna göndərərək təklif və rəylərini verə bilərlər.

Əlavə sualı olan vətəndaşlara Bakı Şəhəri üzrə Təhsil İdarəsinin Çağrı Mərkəzinə (146-1) zəng etmək tövsiyə olunur.

Dekabrın 13-dən etibarən məktəbdə 2024-2025-ci tədris ili I yarımil üzrə Böyük Summativ Qiymətləndirmənin aparılmasına start verilib. BSQ məktəbin fəaliyyət planına uyğun olaraq təyin olunmuş nəzarətçilərin iştirakı ilə keçirilib. BSQ-nin keçirilməsində əsas məqsəd muvafiq məzmun və dəyərləndirmə standartları əsasında hazırlanmış vasitələrlə şagirdlərin nəaliyyətlərini üzə çıxarmaq, bilik və bacarıqlarını yoxlamaqdan ibarətdir.

Respublika fənn olimpiadalarının (RFO) rayon (şəhər) mərhələsinin nəticələri açıqlanıb. Nəticələrə görə Nalən Tağızadə Azərbaycan dili və ədəbiyyat fənni, Mehriban Cəfərova, Şahin Əliyev, Əli Kərimov Riyaziyyat fənni, Zeynalabdin Əzimov, Leyla Quliyeva, Tunar Məmmədov, Rəvan Həsənzadə, Yusif Əkbərov, Tural Əzimzadə Tarix fənni üzrə uğur əldə edərək növbəti tura vəsiqə qazanıblar.