Azərbaycan Xalq Cümhuriyyəti - 100
27 aprel 2018-ci il tarixində Elman Heydərov adına 197 saylı məktəbin kitabxanasında AXC-nin “100” illiyi ilə əlaqədar olaraq Dəyirmi masa keçirildi. Tədbiri kitabxana müdiri Məmmədova Zülfiyyə açıq elan etdi. İlk öncə Azərbaycan Respublikasının Himni səsləndirildi. Daha sonra söz verildi məktəbin tarix müəllimi Səlimova Maviləyə. O, öz çıxışında bildirdi ki, Azərbaycan Xalq Cümhuriyyəti və ya Azərbaycan Demokratik Respublikası Azərbaycan xalqının Çar Rusiyasına qarşı milli azadlıq mübarizəs i nəticəsində , Birinci Dünya müharibəsi dövründə Şimali Azərbaycanda yaranmış müstəqil dövlət və Müsəlman Şərqində ilk parlament respublikası kimi tanınmışdır. Həmçinin tarix müəllimi qeyd etdi ki, dövlət hakimiyyəti üç qoldan ibarət idi: - Azərbaycan parlamenti, Hökumət, məhkəmə hakimiyyəti. Dövlət parlamentin qəbul etdiyi qanun və qərarlar əsasında idarə olunurdu. Parlamentdə Azərbaycan ərazisində yaşayan bütün xalqlar, o cümlədən sayları çox az olan xalqlar da öz deputatları ilə təmsil olunmuşdular.
Daha sonra çıxış üçün söz məktəbin dil-ədəbiyyat müəllimi Abbaslı Asifə verildi. Ədəbiyyat müəllimi bildirdi ki, Azərbaycan Xalq Cümhuriyyətinin yaranması ərəfəsində Cənubi Qafqazda azərbaycanlıların elliklə yaşadıqları ərazilər təqribən 150 min kv. Km-ə bərabər idi. 1918-ci ildə Cənubi Qafqazda müstəqil dövlətlər meydana gəldikdə əzəli Azərbaycan torpaqlarının bir hissəsində Ermənistan Respublikası yaradıldı. AXC hökuməti, həmçinin Azərbaycanın qədim mədəniyyət mərkəzlərindən biri və keçmiş İrəvan xanlığının paytaxtı olan İrəvanı da ermənilərə güzəştə getməyə və onu yeni yaradılan Ermənistan Respublikasının “siyasi mərkəzi” kimi tanımağa məcbur oldu.
Daha sonra məktəb şagirdləri AXC-nin “100” illiyi ilə bağlı şeirlər səsləndirdilər.
Sonda məktəbin kitabxana müdiri Məmmədova Zülfiyyə çıxış edərək bildirdi ki, Azərbaycan Xalq Cümhuriyyəti 1920-ci il aprelin 28-də beynəlxalq hüquq normalarını kobudcasına pozan RSFSR-in hərbi müdaxiləsi nəticəsində aradan qaldırıldı. Şimali Azərbaycan rus-bolşevik qoşunları tərəfindən işğal edildi və yenidən Rusiyaya tabe olundu. 1991-ci ildə Sovet Sosialist Respublikaları İttifaqı dağılması nəticəsində, Azərbaycan xalqı Şimali Azərbaycanda dövlət müstəqilliyini yenidən bərpa etdi . Azərbaycan Respublikası Azərbaycan Xalq Cümhuriyyətinin varisidir.
Çıxışını bitirdikdən sonra kitabxana müdiri tədbiri bağlı elan etdi.
