Məktəbimizdə beşyaşlılar üçün tədbir keçirildi
Mayın 29-da məktəbimizin həyətində məktəbəhazırlıq qruplarında təhsil alan balacalarımız üçün böyük bayram konserti keçirildi. Məktəbəhazırlıq qruplarının əsas məqsədi beş yaşlı uşaqların tədrisə hazırlıqlı başlaması, dərs prosesinə öncədən alışması, məktəb təliminə hazırlığı ilə əlaqədar psixoloji dayanıqlılığın artırılması, əhatə olunduqları aləmə və təhsil mühitinə uyğunlaşdırılması, onlarda müəyyən bilik, bacarıq və vərdişlərin formalaşdırılmasıdır. Tədbirdə balacalarımız ilboyu əldə etdikləri bilik və bacarıqları nümayiş etdirdilər. Tədbiri məktəbin direktoru Rəna Süleymanova açdı. O, balacaları məktəbəhazırlıq qruplarında təhsillərini başa vurmaları münasibətilə təbrik etdi. Sonra məktəbimizin ibtidai siniflər üzrə direktor müavini Tahirə Məmmədbəyova çıxış edərək şagirdlərimizə uğurlar arzuladı. Beşyaşlılar qrupunda dərs deyən Nərminə Qaragözova və Təranə Abdullayeva da uşaqlara xoş arzularını bildirdilər. Tədbirdə şagirdlərimiz Azərbaycana həsr olunmuş şeirlər söylədilər, məktəbimizin "Qönçə" xor qrupu isə şən mahnıları ilə tədbirə xüsusi rəng qatdı. 0"a" sinfinin şagirdləri "Dəcəl uşaqlar" musiqisinin sədaları altında əyləncəli rəqs ifa etdilər. Həyətdə beşyaşlıların əl işlərindən ibarət stend nümayiş olundu. Tədbirin sonunda bütün uşaqlar rəqsə dəvət olundu. Biz də balacalarımızı təbrik edir, onlara gələcək işlərində uğurlar arzulayırıq!
