18 №-Lİ TAM ORTA MƏKTƏB

Elm və Təhsil Nazirliyinin dəstəyi, Respublika Uşaq-Gənclər İnkişaf Mərkəzinin təskilatçilığı ilə Ulu öndər Heydər Əliyevin anadan olmasının 100 illiyinə həsr edilmiş "Tarix: şəxsiyyətlər və proseslər" adlı məktəblilərin respublika tədqiqat və yaradıcılıq müsabiqəsində məktəbimizin "Ekoerudit" ekoklubunun lideri Yusif Abdullayevin "Heydər Əliyev və ətraf mühitin qorunması" mövzusunda tədqiqat işi 1-ci yerə layiq görülüb. Ümummilli lider Heydər Əliyevin Azərbaycan təbiətinə böyük məhəbbətini, təbii sərvətlərə qayğıkeş münasibətini, uğurlu ekoloji siyasətini əks etdirən tədqiqat işində hazırda ölkəmizdə uğurla həyata keçirilən ekoloji layihələr, ekoklub üzvlərinin iqlim dəyişmələrinin azaldılması, suya, enerjiyə qənaət, tullantıların təkrar istifadəsi, yaşıllaşdırma tədbirlərində fəaliyyəti əks etdirilib. Biz də öz növbəmizdə, şagirdimizi təbrik edir, yeni-yeni uğurlar qazanmağını arzulayırıq.

Bakı Şəhəri üzrə Təhsil İdarəsi (BŞTİ) tərəfindən paytaxtın təhsil müəssisələrinin iştirakı ilə “Məktəblinin yay mütaliəsi” adlı layihəsinə start verilir.

Layihənin əsas məqsədi şagirdlərin yay tətili günlərində asudə vaxtlarının səmərəli təşkili, mütaliəyə maraqlarının artırılması, kitab mübadiləsi mədəniyyətinin genişləndirilməsi, oxu bacarıqlarının inkişaf etdirilməsi və nitq vərdişlərinin təkmilləşdirilməsindən ibarətdir.

Layihə çərçivəsində paytaxtın təhsil müəssisələri şagirdlərin oxuduğu kitabları əks etdirən fotoşəkilləri, yaxud oxuduqları əsər və onun müəllifi ilə bağlı fikirlərinə dair videogörüntüləri məktəbin sosial şəbəkə hesablarında #məktəblininyaymütaliəsi haşteqi ilə paylaşması nəzərdə tutulur.

Qeyd edək ki, layihə sentyabr ayına qədər davam edəcək.

17-19 iyun tarixində Qubada keçirilən Kikboksinq üzrə yeniyetmələr və gənclər arasında keçirilən ölkə birinciliyində məktəbimizin 10c sinif şagirdi Hüseynova Aysu final döyüşündə rəqibinə qalib gələrək Azərbaycan birincisi olmuşdur. Şagirdimizi təbrik edir, uğurlarının davamını diləyirik.

İyun ayının 21-dən etibarən dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb. Riyaziyyat fənnini tədris edən müəllimlərin iştirak etdiyi bugünkü sertifikatlaşdırmada məktəbimizin müəllimləri yüksək nəticələr əldə edərək uğur qazanıblar. Belə ki, mümkün 60 baldan Muradəliyeva Səadət 56, Səmədova Aidə 55, Məmmədova Nuranə 55, Zeynalova Yeganə 55, Tağıyeva İradə 51, Sadıxova Şəlalə 51, Ağakişiyeva Səidə 50 bal toplayıblar. Sertifikatlaşdırmada iştirak edən bütün müəllimlərə uğurlar arzulayırıq.

İyunun 21-də dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb.

Qaydalara müvafiq olaraq, test imtahanı ilə bağlı məlumat 15 may tarixində iştirakçıların şəxsi kabinetlərinə göndərilib.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində çalışan 2 379 təhsilverən sertifikatlaşdırma prosesinin test imtahanı mərhələsinə  dəvət olunub.

Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova və BŞTİ-nin müvafiq struktur bölmə rəhbərləri imtahan mərkəzinə gəlib və müəllimlərə öz tövsiyələrini verib, uğurlar arzulayıb.

Qeyd edək ki, test imtahanı mərhələsində 120 dəqiqə müddətində təhsilverənlərin tədris etdiyi fənn üzrə ümumi təhsil proqramlarına, tədris metodikasına və təlim strategiyalarına aid 60 sual təqdim edilir. Hər düzgün cavab 1 balla qiymətləndirilir. Bu mərhələnin nəticələri üzrə balların hesablanması avtomatlaşdırılmış rejimdə proqram təminatı vasitəsilə həyata keçirilir və imtahan başa çatdıqdan dərhal sonra namizədin kompüterinin ekranında görünür.

Nəzərinizə çatdırırıq ki, test imtahanında mümkün 60 baldan minimum 30 bal toplamış təhsilverənlər sertifikatlaşdırmanın müsahibə mərhələsinə iştirak hüququ qazanacaq.

Xatırladaq ki, Nazirlər Kabinetinin 18 avqust 2022-ci il tarixli qərarına əsasən, dövlət ümumi təhsil müəssisələrinin təhsilverənlərinə sertifikatlaşdırmanın nəticəsinə uyğun olaraq tədris edilən dərs saatına görə test imtahanı mərhələsində nəticə göstərənlərin vəzifə maaşlarına əlavələr ediləcək.

Sertifikatlaşdırmada iştirak edən bütün müəllimlərə uğurlar arzulayırıq!