18 №-Lİ TAM ORTA MƏKTƏB

11.10.2019 tarixində məktəbimizin 9-11-ci sinif şagirdləri Bakı Expo Mərkəzində 13-cü Azərbaycan Beynəlxalq Təhsil sərgisində oldular. Hər il olduğu kimi sərgiyə bir çox ölkələrdən iştirakçılar qatılmışdı. Sərgidə “Escape room”, “Məktəbdənkənar fəaliyyət”, “Təhsil Texnologiyalar Mərkəzi”, “Gənc Müəllimlər Assosiasiyası”, “Bir Tələbə-Könüllü proqramı”, SABAH qrupları ilə bağlı stendlər  və “Təhsil TV”  Media Mərkəzi təqdim olunmuşdu. Eyni zamanda  yerli və  xarici universitetlər, dil kursları, təhsil mərkəzləri də həmin sərgidə iştirak etmişdi. Sərgi iştirakçıları şagirdlərə təhsil müəssisələri , onları fəaliyyəti , dərs mühiti barədə məlumat verib intellektual oyunlarla şagirdlərin diqqətini cəlb etdilər. Şagirdləri maraqlandıran suallar cavablandırdılar . Sonda isə şagirdlərimiz xatirə şəkli çəkdirdilər.  

08.10.2019-tarixində məktəbimizdə Azərbaycan Respublikası Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliynin birgə  lahiyəsi ilə yaradılan “Məktəblinin dostu” əməkdaşları “Siqaretə yox” mövzusunda təlim keçirdilər. Təlimdə 8-ci sinif şagirdləri iştirak etdi. Təlimin keçirilməsinin əsas məqsədi məktəblilər arasında zərərli vərdişlər haqqında məlumat vermək¸bununla bağlı maarifləndirmə işləri aparmaq idi. Tədbirdə “Məktəblinin dostları” tərəfindən hazırlanmış video çarx nümayiş etdirildi. Şagirdlərə bu vərdişlərin fəsadlarından¸ sağlamlığa mənfi təsirindən söhbət edildi. Sonra gənclər mövzu ilə bağlı müxtəlif sferadan olan insanlarla sorğu keçirərək onlardan aldıqları cavablar əsasında zərərli vərdişlərin çıxış yollarından danışdılar. Lahiyənin digər siniflərdə də davam etdirilməsi nəzərdə tutulub.

04.10.2019-cu il  tarixində məktəbdə beynəlxalq müəllimlər gününə həsr olunmuş “Gələcəyimizi quranlar” adlı konsert proqramı keçirildi.  Tədbirdə bütün siniflər üzrə şagirdlər iştirak etdi. Şagirdlər tərəfindən hazırlanan yumoristik video çarx müəllimlər tərəfindən maraqla qarşılandı. Hazırlanan səhnəciklər və rəqslər tədbirə xüsusi rəng qatdı. Sonra isə müxtəlif siniflər üzrə hazırlanan ifalar səsləndi. Müəllimlərin sözlə ifadə olunmayacaq böyük zəhmət və əvəzsiz xidmətlərini şagirdlər öz səhnəciklərində  nümayiş etdirdilər. Tədbirin sonunda məktəbin direktoru Rəna Süleymanova bu şərəfli sənət sahiblərini, bu adın mənəvi yükünü təmiz vicdanla daşıyan bütün müəllimləri təbrik edərək onlara səbr, dözüm ,uğurlar və nailiyyətlər arzuladı.

Bakı Şəhəri üzrə Təhsil İdarəsi (BŞTİ) tərəfindən 5 oktyabr-Beynəlxalq Müəllimlər Gününə həsr olunmuş təntənəli tədbir keçirilib.

Tədbirdə BŞTİ-nin müdiri Rəşad Tağıyev, idarənin müvafiq struktur bölmə rəhbərləri, Azərbaycan Təhsil İşçiləri Azad Həmkarlar İttifaqının Bakı şəhəri rayon Komitələrinin sədrləri, məktəb direktorları, müəllimlər, şagirdlər, məzunlar və media nümayəndələri iştirak ediblər.

Mərasim Dövlət himninin səsləndirilməsi ilə başlayıb.

Tədbir iştirakçılarını salamlayan BŞTİ-nin müdiri Rəşad Tağıyev qarşıdan gələn Beynəlxalq Müəllimlər Günü münasibətilə həyatını xalqın işıqlı gələcəyinə həsr edən müqəddəs peşə sahiblərini təbrik edib və onlara fəaliyyətlərində uğurlar arzulayıb.

R.Tağıyev təhsil sahəsində aparılan islahatlardan, dövlət başçısı cənab İlham Əliyevin təhsilə göstərdiyi diqqət və qayğıdan danışıb. İdarə müdiri ölkəmizdə təhsil işçilərinin sosial müdafiəsinin möhkəmləndirilməsi istiqamətində görülən işlərdən bəhs edib, müəllimlərin dövlətin hərtərəfli qayğısı ilə əhatə olunduğunu vurğulayıb. Bildirib ki, Prezident İlham Əliyevin təhsilə qayğını dövlət siyasətinin prioritetləri sırasına daxil etməsi ölkəmizin gələcəyini daha etibarlı və inamlı görmək əzmindən xəbər verir.

İdarə müdiri qeyd edib ki, dövlətin məktəbə, təhsilə, müəllimə göstərdiyi qayğının nəticəsidir ki, bu gün ali məktəbə qəbul olunan gənclərimiz arasında təkcə qızlar deyil, oğlanlar da müəllim peşəsinə daha böyük maraq göstərirlər.

Mərasimdə çıxış edənlər müəllimlik peşəsinin şərəfli peşə olduğu üçün bu adı daşıyanlara həmişə böyük hörmət və ehtiram göstərildiyini qeyd ediblər. Həmçinin onlara göstərilən diqqət və qayğıya görə təşəkkürlərini bildirib, yaradılan geniş imkanlardan yüksək səviyyədə bəhrələnərək ölkəmizin gələcək inkişafı üçün Azərbaycana layiqli vətəndaşlar yetişdirmək yolunda səylə çalışacaqlarını ifadə ediblər.

Daha sonra uğurlarına və səmərəli fəaliyyətinə görə məktəb direktorları, müəllimlər, şagirdlər və məzunlar mükafatlandırılıb.

Tədbir şagirdlərin hazırladıqları ədəbi-bədii kompozisiyalar ilə davam etdirilib.

Bakı Şəhəri üzrə Təhsil İdarəsinin tabeliyindəki (BŞTİ) ümumi təhsil müəssisələrində qarşıdan gələn 5 oktyabr-Beynəlxalq Müəllimlər Günü ilə əlaqədar tədbirlər keçirilib.

Təhsil müəssisələrində Beynəlxalq Müəllimlər Gününə həsr olunan konfranslar, mühazirə və “Dəyirmi masa”lar, şagirdlərin əl işlərindən ibarət sərgilər, bədii qiraət gecələri təşkil edilib. Həmçinin rəsm, şeir, inşa müsabiqələri də keçirilib.

BŞTİ-nin əməkdaşlarının, yerli icra qurumlarının, ziyalıların, məktəblərin pedaqoji kollektivinin, valideyn və şagirdlərin iştirak etdiyi mərasimlərdə bildirilib ki, həyata keçirilən kompleks tədbirlər nəticəsində müəllimlik rəqabətli bir peşəyə çevrilib və ümumilikdə müəllim peşəsinə olan maraq artıb. Həmçinin bu il ali məktəblərə qəbul imtahanı zamanı yüksək bal toplayan çox saylı abituriyent müəllim peşəsini seçib.

Tədbirlərdə həyatını xalqın işıqlı gələcəyinə həsr edən müqəddəs peşə sahiblərinin cəmiyyətimizə və gələcəyimizə verdiyi töhfələrdən də söhbət açılıb. Çıxış edən müəllimlər yaradılan geniş imkanlardan bəhrələnərək ölkəmizin gələcək inkişafı üçün yüksək təhsilli və savadlı gənclər yetişdirmək yolunda əllərindən gələni əsirgəməyəcəklərini söyləyiblər.

Həmçinin tədbirlərdə öz səmərəli fəaliyyəti ilə fərqlənən qabaqcıl müəllimlər təltif olunublar.

Şagirdlər müəllimlərə həsr olunmuş şeirlərdən parçalar səsləndirib, mahnılar ifa edib, ədəbi-bədii kompozisiyalar nümayiş etdiriblər.