“Şərqin sönməyən Günəşi” adlı ədəbi-bədii tədbir keçirildi
Mayın 28-də Respublika gününə həsr olunmuş “Şərqin sönməyən Günəşi” adlı ədəbi-bədii kompozisiya və “Dövrünü özündə əks etdirən əsər” başlığı altında “Əli və Nino” əsərinin müzakirəsi keçirildi. Tədbir “Azərkitab” Kitab Təbliğat Mərkəzində keçirildi.Tədbirdə Yasamal rayon İcra Hakimiyyətinin başçısı Əziz Əzizov, “Azərkitab” Kitab Təbliğatı Mərkəzinin təsisçisi və direktoru Sabir Həsənov, Azərbaycan şairi və yazıçısı Əli Rza Xələfli,tarix elmləri üzrə fəlsəfə doktoru, tarixçi-arxeoloq Təvəkkül Əliyev, şair Yusif Nəğməkar, rayon ictimaiyyəti və ziyalıları, M.Müşfiq adına 18 saylı məktəbin rəhbərliyi, müəllimləri və şagirdləri iştirak etdilər. Tədbiri məktəbin direktoru Rəna Süleymanova giriş sözü ilə açaraq tədbir iştirakçılarını Respublika günü münasibətilə təbrik etdi. Sonra şagirdlərin ifasında respublika gününün məzmun və mahiyyətini açıqlayan çıxışlar təqdim olundu. Tədbirdə iştirak edən alimlər həmin dövr tariximizi təhlil etdilər. Sonra şagirdlərimiz tərəfindən Qurban Səidin “Əli və Nino” əsərinə həsr olunmuş və İçərişəhər Dövlət Tarix-Memarlıq Qoruğunda lentə alınmış videosüjet nümayiş olundu. Videosüjetin nümayişindən sonra şagirdlər əsəri, onun məzmununu, əsərdəki obrazları müzakirə etdilər. Tədbirdə iştirak edən tarixçi-alim Əli Rza Xələfli cümhuriyyət tariximiz haqqında maraqlı faktlar səsləndirdi. Sonra 8-ci sinif şagirdlərinin ifasında Respublika gününə həsr olunmuş ədəbi-bədii kompozisiya nümayiş etdirildi. Tədbirin sonunda Azərbaycan Respublikası Təhsil Nazirliyinin dəstəyi ilə lentə alınan “Himnimizə hörmət və ehtiramla” videoçarxı nümayiş olundu.
