Yazıçı Reyhan Yusifqızı ilə görüş keçirildi
Mayın 17-də Firudin bəy Köçərli adına Respublika Uşaq Kitabxanasında yazıçı Reyhan Yusifqızı ilə görüş keçirildi. Məktəbimizin 2-ci sinif şagirdləri yazıçının “Zamanın əsrləri”, “Yaşıl gözlü qız” əsərlərini müzakirəyə çıxardılar. Görüşdə yazıçı, Azərbaycan Yazıçılar Birliyinin üzvü, riyaziyyatçı, Bakı Dövlət Universitetinin dosenti Reyhan Yusifqızı da iştirak edirdi. Əvvəlcə Reyhan Yusifqızının həyat və yaradıcılığına həsr olunmuş videoçarx nümayiş olundu. Sonra şagirdlər oxuduqları əsərlər haqqında fikirlərini bildirdilər, obrazları təhlil etdilər. Onlar Leminin başına gələn əhvalatlar haqqında fikirləri ilə bölüşdülər. Sinif müəllimi Mehriban Qarayevanın verdiyi sualları məntiqi ardıcıllıqla tamamladılar. Şagirdlər özləri düzəltdikləri zaman maşını ilə tarixə reyd etdilər, Azıx mağarası, Qobustan qayaüstü rəsmləri haqqında maraqlı məlumatlar verdilər. Şagirdlərin qeyri-standart fikirləri, təfəkkür və təxəyyülü, nitq mədəniyyəti, yazıçının və kitabxana əməkdaşlarının böyük rəğbətinə səbəb oldu. Sonda xatirə şəkilləri çəkdirildi.
