“Bəşər səni TƏK yaratdı!” başlığı altında böyük bayram konserti keçirildi
Bu gün məktəbimizdə ümummilli lider Heydər Əliyevin anadan olmasının 96-cı ildönümünə həsr olunmuş “Bəşər səni TƏK yaratdı!” başlığı altında böyük bayram konserti keçirildi. Tədbiri giriş sözü ilə açan təlim-tərbiyə işləri üzrə direktor müavini Bəsti Ağayeva Ulu öndərin həyat və fəaliyyəti haqqında geniş məlumat verdi. Müstəqil Azərbaycanın memarı olan Heydər Əliyevin Azərbaycan dövlətinin inkişafı üçün yorulmaz əmək fəaliyyətindən, keçdiyi ömür yolundan, fədakar mübarizəsindən, dövlətimizin və xalqımızın gələcəyi naminə gördüyü işlərdən söz açdı. Sonra məktəbimizin şagirdləri, rəqs dərnəyinin və məktəb xorunun üzvləri bir-birindən maraqlı çıxışlarını nümayiş etdirdilər. Məktəb xorunun ifa etdiyi “Gənc Heydərçilər” mahnısı böyük marağa səbəb oldu. 6-cı sinif şagirdi Müzəffər Fərzəliyevin Azərbaycan bayrağı qarşısında ifa etdiyi “Ey Vətən!” mahnısı gurultulu alqışlarla qarşılandı. Tədbir Aybəniz Haşımova və onun “Bülbüllər”kollektivinin ifasında “Sən elə bir zirvəsən” mahnısına hazırlanmış möhtəşəm kompozisiya ilə tamamlandı.
