Yaşıllaşdırma aksiyası keçirildi
Aprelin 22-də “22 aprel- Beynəlxalq Yer kürəsi günü”nə həsr olunmuş yaşıllaşdırma aksiyası keçirildi. Dünyanın 141 ölkəsində qeyd olunan “22 aprel- Beynəlxalq Yer kürəsi günü”nə qoşulan gənc ekoloqlarımız torpaq sahəsini alaqdan təmizlədilər. Onlar məktəbin sahəsində görkəmli Azərbaycan şairi Mikayıl Müşfiqin xatirəsini əbədiləşdirən abidənin ətrafında yaşıllaşdırma işləri apardılar. Məktəb həyətindəki dibçəklərə zeytun budaqları basdırıldı. Məktəbyanı sahəyə qırmızı və ağ süsən, qızılgül və digər dekorativ bitkilər əkildi. Təhsil Nazirliyi Respublika Uşaq-Gənclər İnkişaf Mərkəzinin direktor müavini, biologiya üzrə fəlsəfə doktoru Lalə Dadaşova Beynəlxalq Yer kürəsi günü haqqında şagirdlərə məlumat verdi, sağlam ətraf mühitin yaradılmasında yaşıl bitkilərin xüsusi əhəmiyyəti olduğunu bir daha qeyd etdi. Şagirdlər ilboyu bu ağaclara qulluq edəcək, onları artıraraq ətraf mühitin sağlamlaşdırılmasına töhfə edəcəklər.
