“Narkomaniya ümumbəşəri bəladır” mövzusunda maarifləndirici seminar keçirildi
Aprelin 12-də məktəbimizdə “Narkomaniya ümumbəşəri bəladır” mövzusunda maarifləndirici seminar keçirildi. Tədbirdə Yasamal rayon Polis İdarəsinin rəisi, polis polkovniki Cəmil Əmirov, Yasamal rayon Polis İdarəsinin İctimai Təhlükəsizlik Şöbəsinin rəisi, polis polkovnik-leytenantı Natiq Pircanov, Yasamal rayon Polis İdarəsinin 27-ci Polis Bölməsinin rəisi, polis polkovnik-leytenantı Cavid Usubov, Bakı şəhər Narkoloji Dispanserin narkoloq həkimi Rövşən Kərimli və Yasamal rayon Polis İdarəsinin digər əməkdaşları iştirak edirdi. Əvvəlcə Ümummilli lider Heydər Əliyevin və torpaqlarımızın azadlığı uğrunda şəhid olmuş həmvətənlərimizin ruhu 1 dəqiqəlik sükutla yad edildi. Sonra məktəbin direktoru Rəna Süleymanova qonaqları salamlayaraq, sözü Yasamal rayon Polis İdarəsinin rəisi, polis polkovniki Cəmil Əmirova verdi. Cəmil Əmirov narkomaniyanın beynəlxalq ictimaiyyəti ən çox narahat edən məsələlərdən biri olduğunu qeyd etdi və bu dəhşətli xəstəliyin qlobal fəlakətlərə gətirib çıxaran nəticələri haqqında məlumat verdi. O qeyd etdi ki, narkomanların böyük əksəriyyəti yeniyetmələrdir. Bu xəstəliyə düçar olanlar narkotik vasitələri əldə etmək üçün cinayət törətmək məcburiyyətində qalırlar. Narkoloji Dispanserin həkimi Rövşən Kərimli qeyd etdi ki, narkotik vasitələrdən asılılıq bir çox virus xəstəliklərinin, o cümlədən hepatit “C” və QİÇS-in yayılmasına da gətirib çıxarır, ailələr dağılır, fiziki qüsurlu uşaqlar dünyaya gəlir. O, şagirdlərə ehtiyatlı olmağı, düşünülməmiş addımlar atmamağı, çox məsuliyyətli olmağı, özlərində güclü iradə formalaşdırmağı tövsiyə etdi. Sonra polis polkovnik-leytenantı Cavid Usubov dövlət-din münasibətləri və dini radikalizm haqqında geniş məlumat verdi, Azərbaycandakı tolerantlıq ənənələrindən söhbət açdı. Polis polkovnik-leytenantı Natiq Pircanov ailə zəminində yaranan münaqişələrdən, ailədaxili zorakılıqlardan danışdı, gənclərə diqqətli və təmkinli olmağı tövsiyə etdi. Sonda şagirdlərin çoxsaylı sualları cavablandırıldı.
