Məktəbimizin “Aza-18-si” komandası “FIRST LEGO League” mühəndislik və robot texnologiyası üzrə olimpiadada
Aprelin 6-da ADA Universitetində “FIRST LEGO League” mühəndislik və robot texnologiyası üzrə olimpiada keçirilib.1998-ci ildən etibarən Danimarkanın “Lego Education” və ABŞ-ın “First” şirkətinin ortaq layihəsi kimi təşkil olunan “FLL” turnirinin məqsədi uşaqların elm və texnologiyaya olan maraqlarını artırmaq və real problemlərinin həllinə töhfə verməkdir. 2018-2019-cu il mövsümü üzrə Təhsil Nazirliyi, ADA Universiteti və “Mars Academy” şirkətinin birgə təşkilatçılığı ilə təşkil olunan turnirin builki mövzusu kosmosa həsr olunub və “Into Orbit” adlanır. Keçirilmiş yerli turnir çərçivəsində 10-16 yaşlı məktəblilərdən ibarət 30 komanda “Əsas dəyərlər”, “Robot dizaynı”, “Layihə təqdimatı” və “Robot oyunu” adlı 4 kateqoriya üzrə bilik və bacarıqlarını nümayiş etdiriblər. Yarışın münsiflər heyəti Türkiyə Respublikasından dəvət olunmuş beynəlxalq ekspertlərdən və ADA Universitetinin müəllimlərindən ibarət olub.
Bu il məktəbimizin “Aza-18-si” komandası da bu mötəbər yarışda iştirak etdi. 6,7,8-ci sinif şagirdlərindən ibarət olan komandamız müxtəlif sessiyalarda uğurla iştirak edərək, özləri haqqında yaxşı təəssürat yarada bildilər. Onların öz ideyaları haqqında hazırladıqları təqdimat və reklam pauzası isə münsiflər heyəti tərəfindən ən yaxşı təqdimatlardan biri kimi II yerə layiq görüldü. Digər sessiyalarda da komandamız uğurlu nəticələr nümayiş etdirdi. Məktəbimiz yeni mövsümdə də bu olimpiadaya qatılacaq.
