Qadınlar gününə həsr olunmuş "Nə yaxşı ki varsınız!" başlığı altında tədbirlər keçirildi
Bu gün məktəbimizdə 8 Mart Beynəlxalq Qadınlar gününə həsr olunmuş "Nə yaxşı ki varsınız!" başlığı altında tədbirlər keçirildi. Əvvəlcə yuxarı sinif şagirdləri radio qovşaqdan məktəbin bütün müəllimlərini, işçilərini, öz sinif yoldaşlarını təbrik etdilər. Gün ərzində məktəbdə bayrama həsr olunmuş şeirlər, mahnılar səsləndirildi. Dərsdən sonra məktəbin akt zalında böyük bayram tədbiri keçirildi. Tədbiri məktəbimizin xor dərnəyinin üzvləri açdı. Sonra 7a, 8b, 9a sinfinin oğlanları maraqlı musiqi nömrələri ilə çıxış etdilər. 10c sinfinin oğlanlarının hazırladığı canlı klip hər kəsin marağına səbəb oldu. İbtidai sinif şagirdləri də bütün müəllimləri rəqs nömrələri ilə təbrik etdilər. Məktəbimizin 10-cu sinif şagirdi Ağayev Kənan müəllimlərə həsr etdiyi "stand up"ı təqdim etdi. Tədbirə məktəbimizi qızıl medalla bitirmiş Göyüşlü Aydan da dəvət olunmuşdu. Tədbir zamanı bir gün öncə Azərbaycan Respublikası Təhsil Nazirliyi tərəfindən verilmiş qızıl medal təntənəli şəkildə sahibinə təqdim olundu. Göyüşlü Aydan müəllimlərinə və valideynlərinə dərin təşəkkürünü bildirdi. Sonda məktəbimizin rəqs kollektivinin üzvləri gözəl rəqs nömrələri nümayiş etdirdilər.
Bayramınız mübarək, əziz müəllimlər!
