Azərbaycan Velosiped İdmanı Federasiyasının əməkdaşları ilə görüş keçirildi
Bu gün Azərbaycan Velosiped İdmanı Federasiyasının əməkdaşları məktəbimizin qonağı oldular. Yeniyetmə və gənclər arasında velosiped idmanına marağı artırmaq və bu idman növü üzrə kütləviliyə nail olmaq məqsədilə 5, 6, 7 və 8-ci sinif şagirdləri arasında "Velosiped idmanının sağlamlıqda rolu və ondan istifadə qaydaları" mövzusunda seminar-təlim keçirildi. Əvvəlcə Velosiped İdmanı Federasiyası tərəfindən hazırlanmış videoçarx nümayiş olundu. Səhnədə qoyulmuş trenojor-velosiped əsasında şagirdlərə velosipedin hissələri və iş prinsipi haqqında geniş məlumat verildi. Sonra şagirdlərə müxtəlif suallarla müraciət olundu. Şagirdlər sualları cavablandıraraq hədiyyələr qazandılar. Tədbirin gedişi zamanı İran İslam Respublikasının Tehran şəhərində karate üzrə keçirilən beynəlxalq yarışda iştirak etmiş və qızıl medal qazanmış 7-ci sinif şagirdimiz Elnaz Soltanlıya Bakı Şəhəri üzrə Təhsil İdarəsi tərəfindən ünvanlanmış Fəxri Fərman təqdim olundu. Bu xəbər hamı tərəfindən alqışlarla qarşılandı. Sonda xatirə şəkli çəkdirildi.
