İstedadlı şagirdimiz
İsmayıl Vahid oğlu Cəlilov 2010-cu ildə Bakıda anadan olmuşdur. 2016-cı ildə Mikayıl Müşfiq adına 18 nömrəli tam orta məktəbin 1a “Sağlam Təhsil” sinfinə qəbul olunmuşdur. Hazırda İsmayıl 3a ST sinfində təhsil alır. Oxumağa, təhsilə çox böyük maraq göstərir, sinif rəhbəri Ellada Salamovanın öyrətdiyi bilikləri həvəslə mənimsəyir, dərslərindən əla qiymətlər alır. İsmayıl Cəlilov eyni zamanda rəsm və idmanla da peşəkar şəkildə məşğul olur. O, Azərbaycan Respublikası Karate Federasiyasının “Günəş” İdman Klubunun üzvüdür. Çəkdiyi rəsmlər bir-birindən gözəldir! Kətan üzərində çəkdiyi şəkillər dəfələrlə rəsm müsabiqələrində ən yüksək yerlərə layiq görülmüş, diplomlarla təltif olunmuşdur. İsmayılın çəkdiyi şəkillər məktəbimizin divarlarını və sinif otaqlarını bəzəyir. Karate idman növü ilə də məşğul olan İsmayıl dəfələrlə yarışlarda uğur qazanaraq medallara layiq görülmüşdür. Federasiyanın kəmər imtahanından hər il uğurla keçərək qəhvəyi kəmər dərəcəsinə qədər yüksəlmişdir. 2018-ci ildə Azərbaycan Respublikası Karate Federasiyası tərəfindən “İlin idmançısı” seçilmiş və diplomla təltif olunmuşdur. Hazırda məktəbimizin foyesində İsmayılın çəkdiyi rəsm əsərləri sərgilənir.
Məktəbimizin 3a “Sağlam Təhsil” sinif şagirdi İsmayıl Cəlilova yeni-yeni uğurlar arzulayırıq!
