“Yurdun “Heydər” adlı bir dastanısan”
Bu gün məktəbimizdə xalqımızın ümummilli lideri Heydər Əliyevin anım günü ilə əlaqədar “Yurdun “Heydər” adlı bir dastanısan” adlı tədbir keçirildi. Əvvəlcə məktəbimizin foyesində Heydər Əliyevin büstü önünə çiçəklər düzərək ,Ulu Öndərin xatirəsini ehtiramla yad etdik. Sonra ümummilli liderin əziz xatirəsi məktəb kollektivi tərəfindən bir dəqiqəlik sükutla anıldı. Tədbiri açıq elan edən məktəbin direktoru Rəna Süleymanova Azərbaycan dövlətinin memarı və qurucusu, dünya şöhrətli siyasi xadim , türk dünyasının böyük oğlu, hələ sağlığında tarixin yaddaşında əbədiləşən Heydər Əliyevin xalqımız üçün misilsiz xidmətlərindən söz açdı. Sonra tədbir VIII və X sinif şagirdlərinin hazırladıqları kompozisiya ilə davam etdirildi. Çıxış edən şagirdlər Heydər Əliyevin Azərbaycanın dövlət müstəqilliyinin qazanılmasında və möhkəmləndirilməsində müstəsina fəaliyyətindən danışdılar. Onun bacarıqlı siyasətçi, diplomat kimi xidmətlərinə baxmayaraq, incə qəlbli bir ailə başçısı, gözəl ata, qayğıkeş baba olmasından da söz açdılar. Sonda şagirdlərimiz tərəfindən hazırlanan videoçarx nümayış etdirildi. Heydər Əliyevin mənalı həyatı və çoxşaxəli fəaliyyəti bu gün də hamımız üçün örnəkdir.
