“Ekoklub” üzvləri“ Caspian Ecology” 9-cu Ətraf Mühit Sərgisində
Məktəbimizin “Ekoklub” üzvləri 14 noyabr 2018-ci il tarixində Ekologiya və Təbii Sərvətlər Nazirliyinin təşkilatçılığı ilə Bakı Ekspo Mərkəzində keçirilən “Caspian Ecology” 9-cu Ətraf Mühit Sərgisində ekskursiyada oldular. Sərgidə nümayiş olunan ətraf mühitin qorunmasına və sağlamlaşdırılmasına yönəldilmiş yeni texnologiyalar şagirdlərin böyük marağına səbəb oldu. Ekoloji təmiz içməli su istehsalı, sudan təkrar istifadə, plastik və polietilen məhsulların utilizasiyası, ekoloji təmiz qida məhsulları, alternativ enerji texnologiyaları, ekoloji təmiz tikinti materialları, yaşıl landşaft dizaynı və turizm ilə bağlı müxtəlif istiqamətlərdə ekoloji stendlərlə tanışlıq “Ekoklub” üzvlərinin ekoloji biliklərinin artırılmasına imkan yaratdı. Gənc ekoloqlar sərgidə iştirak edən ətraf mühitin mühafizəsi sahəsində beynəlxalq və milli ekoloji təşkilatların mütəxəssisləri ilə görüşüb söhbət etdilər. “Ekoklub” üzvləri ekoloji biliklərini nümayiş etdirərək interaktiv viktorinada sualları cavablandırdılar və Almaniya Beynəlxalq Əməkdaşlıq Cəmiyyətinin xüsusi hədiyyələrinə layiq görüldülər. Sərgidə iştirak edən mütəxəssislərlə görüşlər, xatirə foto-şəkilləri və hədiyyələr “Ekoklub” üzvlərində maraqlı səfər haqqında unudulmaz təəssüratlar oyatdı.
