Məktəbimizdə “Bilik günü”
Bu gün respublikamızın bütün məktəblərində olduğu kimi, Mikayıl Müşfiq adına 18 nömrəli məktəbdə də “Bilik günü” böyük təntənə ilə qeyd olundu. 2018/2019-cu tədris ilinin ilk dərs gününə həsr olunmuş bu tədbir “İşıqlı yolun yolçuları” adlanırdı. Tədbiri açıq elan edən Rəna Süleymanova ötən ilin uğurlarından, məktəbdə gedən quruculuq işlərindən, qarşıda duran prioritet məsələlərdən danışaraq, bütün məktəb kollektivini “Bilik günü” münasibətilə təbrik etdi. O, birinci sinfə qədəm qoyan şagirdləri salamlayaraq, onlara bu tədris ilində müvəffəqiyyətlər dilədi. Məktəbimizin qızıl medala layiq görülən şagirdi Aydan Göyüşlü məhz bu gün aramıza qatılaraq şagirdlərə, müəllim kollektivinə öz ürək sözlərini, təşəkkürlərini bildirdi. Tədbirimizdə iştirak edən Bakı Şəhəri üzrə Təhsil İdarəsinin nümayəndəsi İlhamə İmanova yeni tədris ilində şagirdlərə bol-bol uğurlar arzuladı. Sonra Yasamal Rayon İcra Hakimiyyətinin məsul işçisi Azad Niyazov çıxış edərək, Yasamal Rayon İcra başçısı Əziz Əzizovun təbrik məktubunu kollektivimizə ünvanladı. Daha sonra şagirdlərimiz maraqlı musiqi nömrələri ilə çıxış etdilər. 7a sinfinin təqdimatında səslənən ”Yol” mahnısı tədbirə xüsusi rəng qatdı. Tədbir “Azərbaycan” mahnısının sədaları altında davam etdi. Sonda məktəbin I sinif şagirdləri üçün ilk zəng səsləndi.
