Yasamal parkında Novruz bayramı qeyd edildi
Martın 16-da Yasamal istirahət parkında rayon İcra Hakimiyyətinin təşkilatçılığı ilə Novruz bayramı qeyd edildi. Bayram şənliyində Yasamal rayon İcra Hakimiyyətinin Başçısı Əziz Əzizov, rayonun hüquq-mühafizə orqanlarının rəhbərləri, rayonun ali, orta-ixtisas, orta ümumtəhsil, səhiyyə, mədəniyyət və digər idarə, müəssisə və təşkilatların kollektivləri, ictimai birliklərin nümayəndələri, eləcə də rayon sakinləri iştirak etdilər.
Tədbirdə məktəbimiz Lənkəran mətbəxini təmsil edirdi. Süfrəmizi boranılı aş,qozlu kükü, isti tərə, içi doldurulmuş balıq, toyuq və badımcan ləvəngisi bəzəyirdi . Qızlarımız xəmir açaraq balqabaq qutabı bişirirdilər. Şagirdlərimiz milli musiqi alətlərində Azərbaycan muğamını məharətlə ifa edirdilər. Milli adət-ənənələrimiz, şagirdlər tərəfindən hazırlanmış əl işləri, xüsusi dizaynla tərtib olunmuş bayram otağı rəngarəngliyi ilə diqqəti cəlb edirdi. Qonaqlara armudu stəkanda pürrəngi Lənkəran çayı təqdim edildi.
Yasamal parkında əsl bayram əhval-ruhiyyəsi yaşandı
