Azərbaycan Xalq Cumhuriyyətinin 100 illiyinə həsr olunmuş tədbir keçirildi
Bu gün məktəbimizdə Azərbaycan Xalq Cumhuriyyətinin 100 illiyinə həsr olunmuş böyük tədbir keçirildi. Tədbirdə Yasamal rayon ictimaiyyəti, Böyük Vətən müharibəsi iştirakçıları, rayon məktəblərinin nümayəndələri iştirak edirdilər. Tədbiri giriş sözü ilə açan məktəb direktoru Rəna Süleymanova Azərbaycan Xalq Cumhuriyyətinin keçdiyi şanlı tarixi yol haqqında məlumat verdi və sözü Yasamal Rayon İcra Hakimiyyətinin nümayəndəsi və Qarabağ müharibəsi veteranları və əlilləri İctimai Birliyinin sədri Bəhram Şövdayevə verdi. Məruzəçi Şərqdə ilk Xalq Demokratik Respublikası olan Azərbaycan Xalq Cumhuriyyətinin quruculuq işlərindən söhbət açdı və rayon fəallarını “Vətən naminə” medalı ilə təltif etdi. Daha sonra Səfərbərlik və Hərbi Xidmətə çağırış üzrə Dövlət Xidmətinin Yasamal Rayon İdarəsinin rəis müavini, polkovnik-leytenant Ramin Hacıyev çıxış etdi. O, öz çıxışında Azərbaycan Xalq Cumhuriyyətinin yaradıcılarının əvəzolunmaz xidmətlərini vurğuladı. Sonra Azərbaycan Xalq Cumhuriyyətinin fəaliyyətini əks etdirən film nümayiş olundu. Sonda şagirdlərimizin ifasında Azərbaycan Xalq Cumhuriyyətinin 100 illiyinə həsr olunmuş ədəbi-bədii kompozisiya səsləndi. Tədbir 5-ci sinif şagirdi Müzəffər Fərzəliyevin “Azərbaycan” mahnısının möhtəşəm ifası ilə tamamlandı.
